Home Local Stichting Monumentenfonds Aruba ta celebra ‘International day of Monuments and sites’ cu...

Stichting Monumentenfonds Aruba ta celebra ‘International day of Monuments and sites’ cu adkisicion di un Cas di Cunucu.

Na 1982, ICOMOS a establece 18 di april como Dia Internacional di Monumento y Sitionan Historico. E aña aki e celebracion ta hiba e tema di Rural Heritage. Den cuadro di esaki Stichting Monumentenfonds Aruba (SMFA) a haci uzo di e oportunidad pa anuncia e compra di un cas di cunucu na Pos Abou 19.
E cas aki conoci bou nomber di Cas Tan Tin awor ta pertenece na e coleccion di monumentonan di Monumentenfonds. Actualmente Monumentenbureau, cual ta e instancia di gobierno cu ta encarga cu proteccion di monumentonan, ta trahando tambe riba locual ta e proteccion di e bunita cas di cunucu aki.

Despues cu aña pasa a firma un ‘letter of intent’ pa cumpra Cas Tan Tin. Awe den presencia di Minister di Cultura Xiomara Ruiz-Maduro y Mi Cutisa, cu lo ta e usuarionan nobo di e cas,  directiva di Monumentenfonds Aruba a haci anuncio di e adkisicion nobo aki di SMFA. Tambe SMFA a haci entrega di e yabi na Gobierno di Aruba y Mi Cutisa cu lo ta e huurdonan di e Cas aki entrante awe y tambe lo ta encarga pa mantene e historia di e cas aki bibo.

Cas Tan Tin, a keda construi pa Mario y Johanna Tromp y esaki a fungi manera nan cas caminda cu nan a cria nan nuebe  yiunan. Na e cas aki mes tabata planta entre otro yambo, comcomber chikito, pampuna pa propio uso y ora e cosecha ta hopi tambe tabata bende e berduranan. Asina aki e cas aki tambe ta forma parti di historia di agricultura na Aruba.

Casnan tipico di Aruba a obtene nan nomber ‘Cas di Cunucu’ principalmente pa motibo di ta construi den areanan di cunucu. E casnan di cunucu den e tipo y forma manera e Cas di Tan Tin a wordo construi despues di e casnan di Torto cual tambe na mayoria tabata construi den areanan rural.
Mayoria di e casnan aki tabata pertenece na terenonan grandi cu tabata wordo uza pa cultiva fruta, berdura pero tambe aloe.
Tiki tiki debi na e desaroyo na Aruba e casnan aki cu antes tabata den areanan di cunucu aleha a bira parti di areanan construi y habita pero ta keda ta un refleho di e historia rural di nos isla.

Stichting Monumentenfonds ta orguyoso di e compra di Cas Tan Tin cual ta un contribucion na preserva e bunita Cas di Cunucu aki pa recorda e futuro generacionnan di e historia rural di Aruba.