Un grupo di 40 persona a participa na e curso tocante cuido Geriatrico organisa pa Dr. Horacio E. Oduber Hospital. E grupo di participante tabata consisti di 24 nurse di Hospital y 16 nurse di entre otro Wit Gele Kruis, SABA y IMSan. Participantenan a haya hopi informacion y guia riba cuido specialmente cu enfoke riba nos grandinan. Tambe participantenan mester a haci un presentacion riba diferente aspecto y topiconan importante den e tereno aki. E curso a resulta uno exitoso unda diabierna ultimo tur participantenan a logra ricibi nan certificado.
Dr. Sandro Waterloo, Internista na Dr. Horacio E. Oduber Hospital, a duna di conoce cu na Aruba e grupo di hende edad avansa ta birando mas grandi, esta na Aruba tin ‘vergrijzing’. Ademas, e cantidad di hobennan cu tin un enfermedad normalmente relata na un edad mas grandi tambe ta subiendo. A pasa door di tur e diferente topiconan den e curso aki cu ta importante pa tene cuenta cu ne durante cuido ora di trata un pashent di cierto edad avansa of cu cierto enfermedad.
Tin cu busca un forma pa brinda un miho cuido na tur e personanan cu ta sufri di un of otro enfermedad relata cu edad mas avansa.
A bin cu e curso aki pa conscientisa y siña tocante e diferente enfermedadnan complica den Geriatria. Tabatin enfermeronan di Hospital mes cu a participa, pero tambe di Wit Gele Kruis, SABA y IMSan pa siña nan con anda cu hendenan grandi cu tin varios enfermedad complica y tambe con ta anda cu pashent cu p.e. demencia.
A siña e participantenan kico ta biehes normal, asina dr. Waterloo a duna di conoce. A splica kico no ta normal den biehes, kico ta pasa cu e celebro y mas. Por ehempel bruhamento rond di e persona por causa mas demencia na e pashent. Si por evita di un of otro manera pa no tin confusion, ta yuda pa baha e demencia.
Tambe tin hende cu ta uza 3 of mas remedi y si nan ta hoben e ta bay bon, pero si nan ta hende mas grandi por ehempel esaki por trece cu ne mal funcionamento di un riñon sin cu e pashent sa. Tambe ta importante tin biaha pa ahusta e dosis di remedinan pa evita efectonan negativo. Por haya por ehempel un toxicacion cu remedinan unda cu e pashent por cay mas lihe.
Dr. Horacio E. Oduber Hospital ta masha contento cu e interes grandi di e nursenan pa e curso aki, cu na final, lo traduci den mas y miho cuido pa tur pashent cu tin enfermedadnan geriatrico.