Home » A actua desde momento cu a ricibi keho Minister Dangui Oduber: Tur paso necesario a ser tuma pa proteccion di trahadonan na GKMB

A actua desde momento cu a ricibi keho Minister Dangui Oduber: Tur paso necesario a ser tuma pa proteccion di trahadonan na GKMB

by Admin
0 comment 61 views

 

ORANJESTAD – Desde cu a ricibi e prome keho di e grupo di trahadonan di GKMB, cual ta un departamento cu ta resorta bou di Departamento Di Salud Publico (DVG), Minister Dangui Oduber a tuma tur paso necesario pa por garantisa proteccion di e trahadonan. “For di momento cu nan a vocifera nan preocupacionnan, a atende cu esakinan cu tur seriedad”, Minister Dangui Oduber a bisa.

E mandatario ta splica cu e departamento di GKMB ta traha bou di cierto condicionnan no usual, cual ta trece algun risico cu ne. Sinembargo, e risiconan aki a y ta wordo minimalisa door di entre otro sigui e consehonan di guia cu ta ser duna pa e organisacion mundial di salud (World Health Organization). Tambe ta tuma conseho di e hoofd van dienst di e departamento, kende ta ingeniero y experto riba e materia.

Di otro banda, e trahadonan ta sinti cu nan merece un compensacion extra riba nan salario pa e risico nan aki. Minister Dangui Oduber a cana e caminda corecto di procedura y a pidi Departamento di Recurso Humano (DRH) pa nan conseho, di cual e directora Omaira Lares a duna un conseho negativo riba e compensacion aki.

 

Conseho negativo DRH

Segun DRH ta argumenta den su conseho, tin por lo menos tres factor pakico ta conseha negativamente riba un compensacion extra pa e trahadonan. Esakinan ta entre otro:

  1. DVG/Gobierno a tuma pasonan necesario pa limita efectonan negativo y/of cu ta causa daño.
  2. E trahadonan a ta den un schaal di salario den cual a tuma consideracion e tipo di trabou.
  3. Situacion financiero precario di pais Aruba.

Comportacion sindicato SEPPA

Pa Minister Dangui Oduber ta lamentabel pa mira con atrobe sindicato SEPPA ta demostra nan color politico y ta trata na haci sensacion cu un tema serio. “Un sindicato tey pa para pa derecho di trahadonan, no pa haci wega di politikeria”, e mandatario a indica.

Minister Dangui Oduber: “Despues di 8 aña keto, SEPPA a resucita y ta bin pa bruha tera. Un rato nan kier sinta cu mi persona como Minister pa representa e trahado, otro rato nan ta manda mi persona bay deal directamente cu e trahadonan. Ora haci loke nan mes ta bisa, nan ta sapatia y bisa cu no ta dunanan respet. Ta ki ora ta haci SEPPA contento anto?”

 

E mandatario ta sigui splica cu e ta keda libertad di SEPPA si kier sigui haci wega politico bou di instruccion di e partido cu nan ta sostene, pero tur punto cu a ser treci riba mesa ta sea cla of den proceso pa keda cla. “Un total di 6 punto, riba cual dos so falta pa termina. A busca materialnan extra di proteccion, a cambia material cu tabata mester pa esnan cu ta wordo recomenda, a implementa procedura pa traha cu insecticida y a cambia filternan pa uno mas miho. Aworaki mester djis termina di pone e lockernan nobo, cual ya tey caba y tambe laga tur empleado haci un test di sanger pa wak si tin un posibel contaminacion, cual tambe ta pa siguridad di e trahado.

Finalmente Minister Dangui Oduber a bisa cu ta su deseo tambe di por duna e trahadonan un compensacion extra pero e espacio financiero mester por brinda esaki tambe. No ta kita afo cu lo explora tur posibilidad den combersacion cu coleganan y departamentonan. Gobierno ta consciente cu tin cierto trabounan unda tin mas risico. Na su debido tempo, nos lo discuti esaki den conseho di minister y wak ki solucion por yega na dje.”

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio