Parlamentario Endy Croes ta splica cu e carta di Algemene Rekenkamer a drenta Parlamento. Cual carta exactamente? Desde 5 di Februari 2019 Algemene Rekenkamer a bishita Parlamento riba un invitacion di Parlamento unda den un bijeenkomst a discuti e posibilidadnan legal pa ARA haci un investigacion riguroso den Lotto pa Deporte. Di acuerdo cu Parlamento tin masha hopi informacion y pruebanan di posibel corupcion na gran escala unda miembronan di directiva ta enrikece nan mes den gran forma perhudicando e atleta y deportistanan.
Despues di e bijeenkomst aki ARA a pidi Parlamento poco mas tempo pa nan haci un huiswerk riba esaki pa por duna un contesta di acuerdo cu ley si ARA sin mas por drenta Lotto pa Deporte pa haci un investigacion. Fraccion di MEP y Parlamentario Endy Croes y demas coleganan tabata hopi positivo cu esaki sigur lo ta e caso primordialmente como cu entre otro Gobierno a presta Lotto 17 MIYON pa construi 3 parke y Lotto no ta cumpliendo cu Jaarrekeningen. ARA na su turno a keda di contesta Parlamento 29 di Maart pero a tuma poco mas tempo.
Den un carta ricibi 12 di April ultimo ARA a reconfirma pensamento di Parlamento alrespecto. ARA despues di a reuni cu Directie Wetgeving en Juridische Zaken y a repasa tanto e Ley di LARA AB 1998 GT 20 hopi profundamente como e Staatsregeling a conclui y confirma cu ARA legalmente tin autorizacion legitimo ancra den Ley pa por drenta Lotto pa Deporte y haci un investigacion. Lotto no tin pia legalmente pa para ariba pa nenga e entrada di ARA pa dicho investigacion. Es mas, mediante leynan mester ricibi tur cooperacion di esnan encarga pa duna tur pero tur informacion.
Conclusion final ta cu Algemene Rekenkamer por drenta Lotto pa Deporte pa investiga y Parlamento di Aruba e siman aki mes lo comunica cu ARA pa asina determina e investigacion cu pronto lo inicia tanto un doelmatigheidsonderzoek riba e placanan gasta desde 2010 pero tambe geldelijk beheer di Lotto. Interesante pa pueblo sa di cada florin cu a wordo gasta y/of paga tabata corectamente usa di acuerdo cu Statuutnan di Lotto. Tambe lo nos haya sa ken tur y cual companianan a cobra sumanan astronomico. Finalmente lo mira si por cobra esnan cu a malgasta y fiesta cu placa di Lotto e placanan aki bek of kisas si encontra cosnan menos bunita cu lo mester entrega keho oficial na Ministerio Publico. E bala ta bay cuminsa lora y spera e Raad van Commissarissen por para fuerte pa nan actonan, Parlamentario Croes ta termina bisando.