Den presencia di Ministernan Oduber, Bikker , Romero y miembro di Parlamento Sr. Howell, directiva di Stichtng Monumentenfonds Aruba (SMFA), a duna inicio na e proyecto di restauracion di Uncle Louis store pa asina restaura e monumento aki na skina di Bargestraat y Bernard van der Veen Zeppenfeldtstraat 7.
E monumento di Uncle Louis Store ta un edificio construi den añanan cincuenta, diseña pa arkitecto Jan Nagel y construi den un estilo di ‘Nieuw Bouwen’ tabata pa hopi aña edificio di Uncle Louis Store cu tabata un tienda di bende tela. Na principio di añanan nobenta gobierno a cumpra e edificio y esaki a bira oficina di Aduana. Pa basta aña caba e edificio aki ta bashi y a bira tambe un monumento proteha. Algun tempo pasa SMFA a cumpra e edificio aki for di gobierno cu e meta pa restaura esaki bek.
E supervision di e proyecto aki lo ta den man di Archiosa cu ta e arkitecto tambe cu a haci e studio historico y disenja e restauracion. E contratista cu despues di e destaho publico na januari 2019 lo ta encarga cu e ehecucion di e restauracion lo ta Van Kessel Havenbouw NV.
E proyecto ta planea pa finalisa na principio di 2020 y una bes finalisa e edificio lo bira e oficina di Directie Natuur en Milieu (DNM). Hunto cu DNM a traha riba e proyecto aki cu lo inclui panelnan solar, uso di awa recicla pa e wcnan y un green wall. Tambe den e proyecto aki ta conta cu e guia di FAVI pa por adapta e edificio parti paden pa un trahador di DNM cu ta visualmente incapacita.
Stichting Monumentenfonds Aruba como propietario di edificio lo percura no solamente pa restaura e monumento aki debidamente pero tambe garantisa un mantencion apropia p’e edificio door di crea un plan di mantencion cu mesun structura cu ta wordo implementa na e otro monumentonan cu ta propiedad di SMFA, pa asina nan por ta semper den bon condicion.
Banda di e Watertoren y Nicolaas Store, esaki lo bira e di tres monumento y proyecto cu SMFA tin den e area di San Nicolas for di un total di diestres edificio monumental y tres obheto monumental (p.e. Kalkoven Rancho).
Asina aki SMFA ta sigui duna contenido na e meta pa preserva nos pasado pa futuro.