Home Politics Rocco Tjon: ARA a indica na Parlamento cu nan por investiga Fundacion...

Rocco Tjon: ARA a indica na Parlamento cu nan por investiga Fundacion Lotto pa Deporte (FLPD)

SHARE

 

 

Manera ta conoci algun tempo pasa Parlamento a acerca Algemene Rekenkamer Aruba (ARA) pa explora posibilidad pa ARA haci un investigacion den FLPD. Diabierna ultimo, 12 april 2019, ARA a contesta cu nan a conclui cu nan tin autoridad pa inicia un investigacion den FLPD.

 

PROCEDER DI FLPD

Ta conoci cu FLPD ta obstaculisa e maneho pro-deporte di sr. Dangui Oduber. Nan actuacion ta bay asina lew cu despues di eleccion nan a cambia nan statuut pa asina haci’e imposibel cu por cambia miembronan di raad.

 

Banda cu FLPD ta mal uza e fondonan y no ta inverti esaki den deporte, nan ta haya cu ta bon pa no responsabilisa nan mes na Minister y tampoco ta contesta preguntanan di Parlamento. Algo cu den un estado di derecho ta inacceptabel. Ta bisto cu e proceder aki ta uno politico despues cu por a mira riba rednan social miembronan di raad na actividadnan politico di AVP, pa lanta pueblo pa bay un marcha inhustifica.

 

CONTESTA DI ARA

E carta cu Parlamento a ricibi di ARA ta conclui cu nan tin un base legal pa investiga e maneho di FLPD.

 

Fraccion di MEP sigur ta opina cu si fondonan ta wordo usa pa inversionnan den casnan di e propio miembronan di raad, lunchnan extraordinario, pago na propio companianan di e miembronan di raad, cu esaki sigur no ta beneficia deporte. Y sigur esaki no ta e meta pa cual e fondonan aki mester wordo uza.

 

PA CONCLUI

Dentro di poco e peticion oficial lo wordo manda pa ARA pa nan inicia e investigacion. Fraccion di MEP su unico meta ta pa deporte por florece bek y pa cu e fondonan di FLPD wordo inverti den deporte. FLPD mester stop di hunga politica y stop di perhudica nos deportistanan Arubano.