Pa loke ta trata e refineria, dialuna mainta den conferencia di prensa semanal di Gobierno di Aruba, Prome Minister Evelyn Wever-Croes a duna di conoce cu e situacion cada dia ta bira mas dificil. E placa no ta pasando y e refineria no ta hayando fondo tampoco y no por sigui mantene e trahadonan mas den servicio. Varios hende ta wordo retira na un manera boluntario y esaki lo continua si e refineria no yega na placa.
Gobierno tawata tin un delegacion na Miami pa conbersacionnan cu dirigentenan nobo di PDVSA kendenan a wordo apunta door di señor Juan Guiado. Loke a resalta den e reunionnan aki ta, cu e dirigentenan nobo aki tin un desconfiansa hopi grandi den e Proyecto di Aruba. Esaki segun Prome Minister, ta algo cu e no a anticipa por lo tanto no a tene cuenta cu esaki.
Segun calculonan di e grupo nobo aki di PDVSA, for di e cuentanan bancario di e cuentanan di PDVSA na Merca, 260 miyon dollar a wordo inverti den e refineria na Aruba, sinembargo, despues di investigacionnan cu e grupo nobo aki a haci, 80+ miyon so a wordo inverti den refineria di Aruba. 260 miyon dollar a sali for di e cuenta bancario y 80 miyon dollar so a yega e destinacion fiha. Esaki ta trece e conclusion, cu na caminda mas o menos un 180 miyon dollar a desaparece. Esaki sigur a crea hopi desconfiansa di parti di e dirigentenan aki y esaki nan a expresa tambe.
Un desconfiansa cu ta existi awo ta cu si di 260 miyon dollar, solamente 80 miyon ta yega e destino, kico lo pasa si nan coopera cu e licensia di OFAC y laga e 15 miyon dollar bay? Kico lo yega Aruba y kico lo no yega Aruba? Pa cua motibo tambe nan ta wanta e placa aki un poco mas ainda. Tambe nan ta desconfia pasabra nan sa cu ta e hendenan di e regimen di Nicolas Maduro cu ta esnan encarga cu PDVSA ta responsabel di e desaparacion di e placa. Den nan pensamento Aruba sea a facilita pa e placa aki a wordo frauda of tin ex-mandatarionan di Aruba cu tambe ta involucra den desaparacion di e placa aki.
Prome Minister a expresa cu esaki ta haci hopi dificil pa hiba conbersacion riba e 15 miyon dollar cu tin cu bin pa asina paga trahadonan y yuda algun trahado keda cu nan trabou, pasobra tin un desconfiansa di e magnitud aki. Esaki ta trece hopi tension di ambos banda. Di banda di Aruba, RDA ta insisti cu ta 80 miyon dollars a wordo inverti den e Proyecto aki y no 260 miyon dollar manera ta wordo bisa.
“E desaparicion di e 180 miyon dollar a crea hopi desconfiansa. Na e momento cu Gobierno ta kere cu ta bin hende nobo y cu mas confiansa, a resulta net lo contrario. Gobierno di Aruba awo mester traha riba e credibilidad y confiansa bek. Esaki a cay como un sorpresa sumamente desagradabel pero nos ta trahando riba dje y dunando nos cooperacion na loke nos por na e investigacion cu nan kier haci pa haya sa unda e 180 miyon dollar a bay”, Prome Minister a duna di conoce.
Prome Minister a expresa di ta spera cu den e caso aki, no tin niun ex mandatario di Aruba envolvi den esaki, pasobra no solamente esaki lo hinca e ex mandatario ey den hopi problema legal cu autoridad mericano pero esaki un biaha mas lo pone cara di Aruba na berguensa.