Home Politics Prome Minister Evelyn Wever-Croes: ARUBA MESTER DI STABILIDAD

Prome Minister Evelyn Wever-Croes: ARUBA MESTER DI STABILIDAD

 

 

Diabierna ultimo, Partido AVP a tene un manifestacion dilanti di Bestuurskantoor na unda un grupo di aproximadamente 200 pa 250 persona a presenta. Gobierno di Aruba tawata spera e yegada di e grupo aki debi cu Cuerpa Policial a avisa cu e grupo bou guia di señor Mike Eman lo bin entrega nan manifiesto pa 5or di atardi segun e permit cu nan tawatin (vergunning). Sinembargo, esaki no a pasa pasobra AVP varios biaha a pidi pa pospone e entrega di manifiesto cu a pone Gobierno keda warda. 6or di atardi, Gobierno a dicidi cu no por pospone mas pa evita cu cosnan por sali for di man ora cu cuminsa bira scur.

 

Prome Minister Evelyn Wever-Croes, acompaña pa tur Minister di Gabinete Wever-Croes, a ricibi e manifiesto for di man di señor Geerman kende a lesa e manifiesto den cual ta expresa preocupacionnan. Riba esaki, Prome Minister a contesta señor Geerman y tur presente, cu Gobieno di Aruba ta comprende e preocupacionnan, y honestamente e mandatario a bisa cu Gobierno ta na haltura cu e situacion na Aruba ta difisil. Gabinete Wever-Croes a hereda e situacion hopi difisil aki for di e esnan cu a goberna anterior kendenan ta esnan cu ta na cabes di e manifestacion.

 

“Nos a hereda un situacion hopi dificil pa goberna nos pais. No ta Gabinete Wever-Croes a ocaciona e problemanan dificil ak, pero nos ta bay soluciona nan si. Nos a lora manga y nos a cuminsa traha. Mi a splica señor Geerman y tur presente, cu Aruba mester di stabilidad pa asina Gobierno sigui saca Aruba for di e crisis”, Prome Ministe a duna di conoce.

 

Prome Minsiter a enfatisa cu un eleccion na e momentonan aki, manera cu señor Eman a exigi, no ta contribui net nada na stabilidad di nos pueblo. Fecha di eleccion ta stipula caba pa 2021, pero si acaso AVP ta desea un eleccion prome cu esaki, nan no mester bin manifesta na Bestuurskantoor, sino nan mester acudi na Parlamento cu ta e unico instituto cu por baha un gobierno.

 

Na fin di dia, e manifestantenan a retira sin ningun incidente pa cua Prome Minsiter ta hopi gradici pa esaki. Como Mandatario principal di nos pais, Prome Minister ta respeta derecho di manifestacion di tur hende y tambe ora manifestantenan actua na un manera civico y haci uzo responsabel di e derecho aki.

 

Prome Minsiter: “Esaki lamentablemente, no por bisa cu ta tur cu a bin entrega manifiesto a comporta nan mes na un manera responsabel. Exponentenan politico di AVP, manera señor Mike Eman, señor Mike de Meza, y señor Baba Herde a bin cu un solo meta, esta pa busca provocacion y pa busca pa cosnan sali for di man, kendenan a stroba hasta nan propio vocero, esta señor Geerman di lesa e manifiesto na unda tambe por scucha palabranan menos bunita mientras cu señor Geerman tawata lesando. Nan a kita tambe e microfono for di señor Geerman pa e no bisa nada mas. Mi no ta comprende cua ta e strategia tras di esaki pero si ta di lamenta”.

 

Ora di wak bek atras, Prome Minister a expresa cu tawata un bon manifestacion, a trece puntonan dilanti y den un siman di tempo, Gobierno lo contesta tur e puntonan di e manifiesto.

 

“Sinembargo pa loke ta trata eleccion nobo, esaki lo ta dia 24 september 2021. Si nan ta desea eleccion mas tempran, nan tin pa acudi na Parlamento. Fraccion di AVP den Parlamento mester haci nan trabou. Pa cuminsa nan mester presenta na trabou, haci nan trabou debidamente, hiba debatenan den Parlamento. Señor Mike Eman mester bay bek Parlamento pa e trece su puntonan padilanti. Di e manera aki, no tin mester di paralisa trafico, afecta nos turismo negativamente manera cu a wordo haci diabierna ultimo. Mi ta haci un apelacion pa tur hende respeta nos democracia. Ban respeta e hecho cu e pueblo aki a pidi pa un cambio na september 2017. E pueblo a haya un cambio y nos ta riba e bon rumbo” Prome Minister Evelyn Wever-Croes a termina bisado.