Home » Parlamentario Shailiny Tromp-Lee (MEP): “Felicitacion na tur participante y ganador di Arte di Palabra 2019”

Parlamentario Shailiny Tromp-Lee (MEP): “Felicitacion na tur participante y ganador di Arte di Palabra 2019”

by Admin
0 comment 71 views

 

Di curason mi kier a felicita tur e participante y ganadornan di e competencia literario escolar cu ya pa 11 aña ta keda organisa. Y di awor caba mi kier desea tur hoben cu ta bay representa Aruba na Curacao hopi exito. 

 

Diasabra nochi na Cas di Cultura a tuma lugar e grandioso final di e tremendo proyecto literario y escolar “Arte di Palabra” (AdP) organisa pa Departamento di Cultura Aruba conhuntamente cu Arte di Palabra Aruba. Hunto cu mi Coleganan Sue-Ann Ras y Hendrik Tevreden mi a gosa di e tremendo anochi. Nos por a admira e talento di nos hobennan y scucha nan voz. Nos oreanan a keda caricia y nos curason alimenta y tin momento asta a keda un tiki preocupa pa nan pensamento y mensahe asina profundo. Nan a transforma nan pensamento, sentimento y experencia di bida den diferente emocion y a laga nan alma papia mediante nan poesia presenta. Pa mi semper tabata un placer y privilegio pa asistí na e competencia aki y por duna mi sosten y apoyo na e hobennan.

 

Mi ta considera AdP un tremendo plataforma pa nos hobennan por demostra tur nan potencial y waknan declama cu sinceridad poemanan y storianan cu ta relata na nan vision, deseo, sentimento, emocion, reclamo y anhelo cu asina tanto pasion. Door cu tur aña mi t’ey mi por a ripara cu mayoria di e participantenan ta nobo y esaki sigur ta un desaroyo positivo y cu ta garantisa continuacion constante di AdP. Tur hoben participante ta ganado caba pa solamente e hecho di tabatin e corahe pa subi escenario y  presenta y expresa dilanti di un publico asina grandi. E experiencia cu nan ta adkiri ta di un balor asina importante y cu sigur lo aporta na nan desaroyo den bida. E experiencia ta amplia nan capacidad y ta duna nan balentia pa asumi cualkier reto y responsabilidad cu bida ta pone den nan man pa expresa sin miedo y libertad nan pensamento. Sin lubida cu nan aporte na nos coleccion literario cu nan poemanan ta uno hopi valioso. 

 

Mi kier a felicita tur scol participante principalmente e maestronan encarga cu e preparacion di e hobennan y cu ta motornan grandi tras di cada exito di nos hobennan. Tambe na tur e mayornan comprometi cu nan tarea di educa y stimula nos hobennan pa nan sigi realisa y desaroya nan talento. 

 

Pa finalisa mi kier gradici y felicita Departamento di Cultura y Comision organisado pa un bunita anochi yena di emocion y sigur mi ta sigui subraya e importancia di continuacion di e proyecto aki. Otro proyecto inicia bou auspicio di ex Minister di Cultura sr. Ramon Lee y cu ta subraya cu bou Gobierno di MEP semper ta keda inicia proyectonan cu un balor agrega pa fortifica e fundeshi di nos muchanan y nan desaroyo. 

Di curason mi kier a felicita tur e participante y ganadornan di e competencia literario escolar cu ya pa 11 aña ta keda organisa. Y di awor caba mi kier desea tur hoben cu ta bay representa Aruba na Curacao hopi exito. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio