Oranjestad: Diabierna den oranan di atardi Partido di Pueblo Arubano, AVP su lider, su candidatonan, simpatisantenan, votador etc a sali bay direccion di Bestuurskantoor unda nan a bay entrega un manifesto, den cual nan ta exigi pa un elecion nobo.
Segun e manifestantenan e gobierno aki a pone mucho medida, nan no por biba cu e medidanan mas y kier un elecion nobo. Bou musica nan a cana bay direccion di Bestuurskantoor.
Na yegada varios candidato di AVP cu tabata presente a hiba palabra, por a mira tambe basta polis di tur rango para dilanti bestuurskantoor, esaki pa mantene orden publico. Despues di un rato Minister President di Aruba acompaña pa varios otro Minister a baha pa bin ricibi e manifesto for di señor Tony Geerman, kende tabata e persona encarga pa entrega Prome Minister di Aruba e manifesto.
Prome Minister Evelyn Wever Croes a tuma e manifesto y a informa señor Tony Geerman, cu por lo pronto no lo bin elecion nobo, cu e siguiente elecion na Aruba lo ta dia 24 di September 2021 y cu si e kier election nobo, e mester bay na Parlamento cu esaki. Tambe Prome Minister a informa señor Tony Geerman cu otro siman elo haya contesta riba e puntonan para den e manifesto.
Despues di un rato tur manifestante a cana bay bek direccion pabou, direccion di Cas di Partido.
Tur cos a bay trankilo, e grupo di manifestante no tabata uno hopi grandi y por a wordo bon controla pa e dirigentenan. Semper e orario ta hunga un rol, no ta tur hende ta haya liber pa manifesta. No tabata tin niun incidente, niun destrucion, tur cos a bay nechi y calmo.