Home » Parlamentario Sue-Ann Ras (MEP): “Poder no ta cambia hende, e ta djis revela ken nan ta realmente”

Parlamentario Sue-Ann Ras (MEP): “Poder no ta cambia hende, e ta djis revela ken nan ta realmente”

by Admin
0 comment 46 views

“Si bo ta den un posicion di liderasgo y realmente bo no ta compronde con bo decision- y accionnan por afecta un sociedad completo, anto e ora bo no ta funcionando segun bo capacidadnan como un lider,” Parlamentario Sue-Ann Ras a cuminsa bisa, referiendo na e caso di Utilities NV, unda huez a culpa Gobierno anterior bou liderasgo di Mike Eman di mal maneho.

2 CASO DI MAL MANEHO Y LIDERASGO
Ta parce cu nos ta bayendo den un spiral descendente imparabel cu algun politico y lider di AVP y sin laga afor e directornan, unda nan a perde e autoridad moral di goberna. Mal maneho cu fondo di pueblo, abuso di poder, malversacion, corupcion y soborno a para bira manera algo normal den e gobierno di Mike Eman. Nunca antes den historia di nos pais, a yega di conoce un gobierno cu ta acusa cu prueba di tin incompetencia di liderasgo. Den nos situacion actual, nos futuro generacion tin mester di lider cu curashi, integridad, determinacion y inteligencia pa evita cu liderasgo ta faya, paso si esey faya, ta comproba cu un pais tambe ta faya. Y nos ta wak y biba tur e fayonan aki diariamente den diferente departamento y instancia di gobierno.

MIYONES INVERTI SIN CONTROL
“Ora mi scucha e sumanan astronomico di: 230 miyon florin na interes, 1 biyon florin den Bo Aruba, como 40 mil dollar pa un propaganda den un revista, Hospital cu a surpasa su presupuesto inicial cu mas di 110 miyon florin y asina por sigui menciona, mi ta condena rotundamente e lider principal Mike Eman, di no tabatin e integridad y moralidad di pone su pueblo na prome lugar. E mester a pone un stop inmediato na tur e fechorianan aki y ta un ehempel pa su team, aplicando codigo di bon gobernacion, standard etico y nivel halto di liderasgo moral” Ras a expresa. Esaki ta placa cu por a inverti den enseñansa, deporte, social, cultura y innovacion real y ekipa bo hendenan cu un mihor calidad di bida. Pais Aruba a conoce kico ta economia y maneho sushi, narco complaciente, estafa, fraude y corupcion, cu a bira manera un plaga contemporaneo scondi den gobernacion di Mike Eman.

UN LIDER OPORTUNISTA
“Mi ta condena Mike Eman, pa demostra su actitud di cobarde y mucha malcria, cu a prefera di core bay, paso cu e no por a deal cu e perdida di no tin gobierno absoluto”, Ras a indica. Segun Ras si Mike Eman tabatin tanto pasion y amor pa su pueblo, manera e ta expresa, e lo a demostra esaki y asumi su responsabilidad como Parlamentario, representando su 7 mil y algo votadornan y henter bo partido. “Mike Eman a scoge pa ta un lider oportunista y lidera di un distancia y na su conveniencia, causando segregacion y rabia, en bes di uni e pais aki den e crisis social, moral y financiero cu abo mes a ocasiona!, Ras a finalisa bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio