Home Local Edjean Semeleer… Celebrando 25 aña den e industria di entretenimento

Edjean Semeleer… Celebrando 25 aña den e industria di entretenimento

Tabata na 1994 cu un mucha di 10 aña a subi riba escenario di Cas di Cultura pa representa su skol basico durante pre-final di festival “Voz-i-Landia”, cantando e composicion “Respetami” cu a wordo crea specialmente pa conscientisa contra abuso di menor. E hoben talentoso ey a crese, desaroya y bira un di e personahenan mas stima y respeta di Aruba. Un artista multifacetico cu numeroso bes a kibra barera riba varios area cu hopi a pensa cu lo no tabata posibel.Durante 2019 nos ta celebra e hecho cu pa 25 aña largo el a deleita su Pais cu su musica y su proyectonan.

Nos tur por corda varios album musical y conciertonan grandi y exitoso cu Edjean a presenta. Tambe el a desaroya y bira un presentador di television formidable cu ultimo añanan tambe a duna hopi di su parti pa presenta conciertonan completo pa asina yuda recauda hopi fondo pa un cantidad grandi di organisacion y fundacion local. Esaki ta demostra su compromiso pa duna bek y sirbi su comunidad.

 

Diasabra dia di Rey, 27 di April, un bes mas Edjean lo presenta un concierto. Esaki lo no ta solamente den e cuadro di su celebracion di 25 aña den farandula, pero tambe pa yuda cu un otro causa importane. E biaha aki e lo ta un concierto na beneficio di fundacion Go Cultura. Artistanan invita lo ta e cantante fantastico Amy Sorinio, e talentoso cantante Rajiv Landaeta y tambe The Freewinds Band.

Fundacion Go Cultura ta un fundacion cu a wordo funda pa crea mas plataforma y oportunidad pa tur esnan cu ta forma parti di e industrianan cultural y creativo, pues nos artistanan y sernan creativo cu tin e deseo di sigui siña y tambe desaroya nan talento y habilidadnan. Parti di Go Cultura su mision, ta pa conscientisa con importante “creatividad” como recurso ta pa nos comunidad. Esaki lo crea aun mas adelanto, oportunidad y bienestar pa nos comunidad, specificamente riba terenonan social, cultural y economico. Tambe e fundacion tin como mision pa yuda asisti cu guia na nos artistanan y pa yuda financia proyectonan artistico local, cu apoyo di empresanan di sector priva.

 

Esnan interesa di atende, disfruta di e evento fantastico aki y tambe contribui cu un fundacion asina importante pa nos comunidad, por comunica cu Go Cultura Foundation na telefon 583-0808 pa mas informacion y pa carchi di entrada.