ORANJESTAD – E trabaonan na Washington ta continua y Minister Ruiz-Maduro a reuni cu e Executive Directors di IMF sr. De Lannoy y sr. Doornbosch y a toca diferente tema. Durante e reunion a conbersa, entre otro, riba e resultado positivo di e Article IV mission di Aruba cu recientemente a keda publica y tambe riba e asistencia y apoyo technico cu IMF por brinda Aruba pa nos por yega na cumpli cu nos meta pa recupera credibilidad financiero di nos Pais
Ademas e mandatario y delegacion a haci un presentacion pa Embahada Hulandes na Washington riba e Maneho Economico pa nos Pais y hunto cu esaki a presenta e 6 sectornan prometedor pa diversifica economia di Aruba. E ta importante pa na nivel di Embahada di Reino tambe tin conocemento di e esfuersonan cu Gabinete Wever-Croes ta haciendo pa diversifica e economia di nos pais. Asina aki ora tin inversionista potencial pa Aruba, Embahada Hulandes por yuda asisti nan cu e informacion necesario pa Aruba.
Minister Ruiz-Maduro tabata tin un encuentro ameno cu Embahador di Hulanda na Washington sr. Henne Schuwer. Un punto cu a toca ta e situacion na Venezuela y e efecto cu esaki tin pa Aruba su economia. Ta bon pa Embahada Hulandes ta bon informa riba e efectonan aki pa asina den nan deliberacionnan cu autoridad Mericano nan por indica kiko ta e efecto di por ehempel e sancionnan financiero riba Venezuela, riba e economia di nos como paisnan cu ta bisiña di Venezuela.
Un otro reunion tabata cu e Executive Director di World Bank sr. Koen Davidse kende ta representa e interesnan di Reino Hulandes na Banco Mundial. Aki a trata entre otro e posibel peticionnan di Aruba pa sosten y apoyo technico pa nos logra nos meta pa recobra credibilidad financiero pa nos Pais.
Durante e forum di capacity building di IMF minister Xiomara Ruiz-Maduro a topa cu su homologo sr. Perry Geerlings Minister di Finanzas di Sint Maarten.