Home » ARUBA REPRESENTA FUERTEMENTE NA SEATRADE CRUISE GLOBAL

ARUBA REPRESENTA FUERTEMENTE NA SEATRADE CRUISE GLOBAL

by Admin
0 comment 56 views

 

 

Oranjestad – E siman aki a tuma luga na Fort Lauderdale, Merca un di e conferencianan mas importante pa loke ta e industria di turismo crucero, esta Seatrade Cruise Global. Esaki a conta cu presencia di Minister di Turismo Sr. Danguillaume Oduber, Aruba Ports Authority, A.T.A. y otro partnernan den e industria di crucero na Aruba.

 

E evento, Seatrade Cruise Global ta trece hunto e liñanan di crucero y demas representantenan di producto y servicionan rond di e industria, manera destinacionnan, puertonan, tour operadornan, associacionnan di e industria, etc. E evento aki a uni riba 11.000 participante den un solo conferencia y mas di 700 compania of organisacion cu a exhibi nan producto y of servicionan.

 

E conferencia tambe ta duna indicacion di e futuro di e industria di turismo crucero. Segun Cruise Line International Association (CLIA) ta spera cu un total di 30 miyon pasahero mundialmente lo tuma un cruise durante 2019. Na 2018 e total di pasahero cu a tuma un cruise tabata 28.2 miyon, cual ta demostra un crecemente significante.

 

E delegacion di Aruba a reuni cu ehecutivonan di e liñanan di crucero importante pa nos destinacion manera Royal Caribbean Cruises y Pullmantur. Durante e reunionnan aki a comparti cu e delegacion e diferente inversionnan y demas proyecto cu ta contribui na e industria y e experiencia di pasaheronan di crucero. Tambe a reuni cu otro destinacionnan ruman cu ta hunga un papel importante den exito di e region sur di Caribe y den e parti di promove un posibel concepto nobo, enfocando riba ‘Dutch Caribbean Heritage’. Aki a reuni cu Corsou, Boneiro, y Sint Maarten. Novedad e biaha aki ta cu Aruba, Boneiro y Corsou a comparti un booth y esaki a funcciona bon. Esaki manera custumber a wordo coordina door di A.T.A. conhuntamente cu APA.

 

Continuamente ta sigui di cerca e desaroyo di e comentarionan di e pasaheronan di crucero cu ta bishita Aruba. E delegacion a confirma un biaha mas e popularidad di nos isla cu puntuacion halto, a base di encuesta di e lineanan crucero, cu ta pone Aruba entre e top 3 di miho destinacion den Caribe. De facto a subraya varios biaha e hecho cu Aruba ta parti di e itinerario cu ta sirbi como e punto cardinal pa scoge e diferente itinerarionan.

 

Pa Aruba e aña aki te cu maart 2019, 292.922 turistanan crucero a bishita nos isla riba un total di 118 barco.

E impacto economico segun e estudio di BREA (Business Research & Economic Advisors) pa Aruba durante 2018, e asina yama Tourism Expenditures’ den nos economia tawata 103 miyon dollar. Pa dia e average cu e turista di barco a contribui na nos economia tawata US$ 122.- cu ta 9% mas cu e estudio anterior na aña 2015, unda e turista di barco tawata gasta un average di US$ 112.- pa dia ora di bishita nos isla.

 

Despues di un aña sumamente exitoso aña pasa, intencion ta pa turismo crucero mantene su mes igual durante 2019.

 

E conferencia tabata uno exitoso cu ta yuda pa sigui desaroya e industria di crucero di Aruba na un forma positivo.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio