Home » UZO DI MEDIA Y COMUNIDAD PA PROMOVE UN ESTILO DI BIDA SALUDABEL BOU HOBENNAN

UZO DI MEDIA Y COMUNIDAD PA PROMOVE UN ESTILO DI BIDA SALUDABEL BOU HOBENNAN

by Admin
0 comment 61 views

 

 

Con comunidad hunto por yuda hobennan tin un estilo di bida mas saludabel tawata e tema central di un simposio duna na Universidad di Aruba den colaboracion cu Radboud Universiteit di Nijmegen, Hulanda. Conocimento, resultado y experiencianan acumula por medio di un proyecto di investigacion cu a wordo implementa na Hulanda y Aruba, a wordo comparti cu publico. Diferente instancia, organisacion y compania den e area di salud y tambe den e area di educacion a atende e simposio aki dia 3 di april 2019.

 

Varios topico a wordo comparti e atardi aki. Marianne Eelens di Departamento di Salubridad Publico di Aruba a duna e promer charla splicando e importancia pa enfoca riba nos ciudadanonan hoben pasobra tin un cantidad alarmante di hende y tambe mucha cu sobrepeso na Aruba. Tambe Aruba tin cifranan halto di malesanan cu ta resultado di un estilo di bida no saludabel manera diabetici, problema di halamento di rosea y curason. Eelens tambe a splica cu un investigaicion a mustra cu ciudadanonan na Aruba ta evalua nan mes peso como un peso normal pero den terminologia di salud un gran parti di nan tin sobrepeso.

 

Moniek Buijzen ta e investigador principal di e proyecto MyMovez na Hulanda a splica con media y e communidad ta contribui na e bienestar di hobennan. E a splica con ta uza media digital pa yega na hobennan cu communicacion positivo y alavez respeta nan privacidad y nan autonomia. Buijzen a mustra con e team di MyMovez ta haci uzo di un Wearable Lab (un celular y un banchi di man) pa asina por ricibi contesta riba preguntanan via celular y por midi movecionan.

 

Kris Bevelander ta coordina e parti di investigacion di e proyecto y e a comparti cu normanan social ta influencia e estilo di bida di hobennan, pero tambe cu e estilo di bida di hobennan ta influencia e normanan den omgeving di muchanan. Un ehempel di un norma social ta cu un persona tin tendencia di come e mes cantidad of e mes tipo di cuminda cu amigonan na un mesa. P’esey e ta importante pa programanan focus riba cambio di norma pa asina logra cambia habitonan cu tin di haber cu salud.

 

Crystal Smit ta un investigador den e area di nutricion di e proyecto MyMovez. Smit ta un Arubiano trahando na Hulanda riba e proyecto aki. Smit cu su team a desaroya e programa “Share H2O” cu ta haci uzo di e influencia cu hobennan tin riba otro pa asina promove e bebemento di awa y asina reduci e consumo di bebidanan cu sucu dor di hobennan. Smit a splica over di diferente componentenan cu nan ta uza den e programa y con e componentenan aki ta traha. Tambe e a demonstra cu e forza di hobennan pa influencia otronan di nan mesun edad ta un manera efectivo cu por wordo bon uza den campañanan den diferente area di salud.

 

Saskia Franken ta haci investigacion y ta docente den e area di mercadeo na UA. Algun aña pasa Franken a aserca Buijzen tocante haci investigacion na Aruba. E interes tawata pas cu MyMovez y p’esey Franken a cuminsa colabora cu Smit y Buijzen. Franken a conta cu e metodo di uza e influencia cu muchanan tin riba otro den nan red social na scol pa promove consumo di awa tambe ta efectivo na Aruba. Posiblemente dor cu Aruba ta un comunidad relativamente chikito na unda por tuma nota liher di habitonan of palabranan di otro. Tambe a splica ki factor ta importante pa uza pa cambia habitonan bou muchanan. A base di e conocimentonan haya aki na Aruba, a haci modificacion na e campaña y actualmente ta test su efectividad.

 

Laura Buijs ta coordina y Esther Rozendaal ta consehero di e proyecto MyMovez. Nan dos a conta cu por haci uzo di persona cu influencia riba media social pa impacta e bienestar di salud di hobennan. E simposio a clausura cu Thabo van Woudenberg cu ta haci investigacion den e area di deporte y movecion. Van Woudenberg a conta over di e posibilidadnan di laga hobenan cu hopi influencia na scolnan traha nan mesun vlogs pa asina nan mand’e rond via media social pa nan motiva otro hoben pa haci mas movecion. Durante e presentationnan diferente pregunta a wordo haci y contesta y e mensahe final tabata pa hunto sigui colabora pa logra metanan. Pa mas informacion: http://mymovez.socsci.ru.nl, [email protected], 5262234.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio