Home Politics Parlamentario Sue-Ann Ras (MEP):  “Sinta na cas haci nada no ta un...

Parlamentario Sue-Ann Ras (MEP):  “Sinta na cas haci nada no ta un opcion pa mi”

 

 

Diabierno ultimo durante reunion publico di prome raportahe di Crisis Plan Social, un biaha mas por mira y experiencia reaccion incomprendibel y decepcionante di colega Mervin Wyatt Ras di partido AVP, relaciona cu parlamentario Sue-Ann Ras su participacion activo den henter Social Crisis Plan (SCP).

 “Laga mi cuminsa na aclarea esaki. Niun momento so mi ta un coordinador di Gobierno pa niun proyecto y mucho menos representa Parlamento completo. Mas bien mi a asumi mi rol como Parlamentario y biniendo di veld di enseñansa, unda cu diariamente bo ta confronta cu hopi problema social, mi ta sinti mi mas yama pa tin un compromiso y responsabilidad, pa asumi den tur loke ta trata e problemanan y e avancenan di e situacionnan social na Aruba” parlamentario Sue-Ann Ras a cuminsa na bisa.

 

SCOGE PA TA UN PARLAMENTARIO ACTIVO

Si bo kier e mesun resultadonan di semper, bo lo keda haci e mesun cosnan di semper. E funcion di un Parlamentario ta netamente ta un representante di e pueblo votador, cu kier y ta anhela pa mira progreso, cambio y exito den henter e cadena social cu SCP. For di momento cu parlamentario Sue-Ann Ras a asumi su responsabilidad como Parlamentario, su intencion tabata pa haci e trabou na e mihor manera posibel, ya cu si nos analisa tur e proyectonan grandi, unda cu a inverti un suma grandi di placa di pueblo, pa ehecuta y realisa varios proyecto, mayoria proyecto a fracasa y ta costando pueblo mas placa ainda, sin cu por duna e resultado desea. Ehempel di esaki tin hopi, manera: Hospital, Green Corridor, Watty Vos Blvd y un sinfin di documento y proyecto social.

“Mi kier enfatisa cu niun momento den henter e proceso mi tabatin derecho di voto y mucho menos dicidi ki direccion e SCP mester bay y kico cada instancia of fundacion mester haci. Mi tabata presente for di inicio di e reunionnan, riba invitacion via e comision fiho social di Parlamento, unda tur parlamentario tabata invita. Cu ami a dicidi pa bay tur e reunionnan, tabata na mi interes, pa sa kico tur ta e problemanan den veld social y dicon tin un explosion di problema social,” ta loke Sue-Ann Ras a sigui elabora.

 

CONTROL DI SCP TA DEN MAN DI FUL PARLAMENTO

Tin biaha bo no sa con pa categorisa cierto expresion of pensamento di sra. Mervin Wyatt Ras, den su ansha pa hiba politica anticua y sin contenido. Ta bon cu Wyatt Ras mes ta indica, cu e ta haya cu parlamentario Sue-Ann Ras ta hopi activo y cu e kier sa kico ta pasando den Departamento di Asuntonan Social. Pero ta bon pa sa, cu no ta eynan so parlamentario Sue-Ann Ras ta interesa pa sa, sino den henter e cadena social, ya cu e profesionalnan di veld, a duna di conoce durante e reunionnan cu tur parlamentario tabata invita, cu nan no tin confiansa den palabra di gobierno ni politico, debi na nan mal experiencianan cu e gobierno anterior. E profesionalnan den veld a indica for di hopi aña atras, cu nan a haci nan maximo, pero ta yega un momento cu e cosnan no lo cana mas y e problemanan social lo escala enormemente. Parlamentario Sue-Ann Ras a tuma e comentarionan aki hopi na serio y p’esey mes el a opta pa ta mas activo, pa vigila gobierno y e minister en cuestion, pa e maneho y fondo yega na e lugarnan destina. “Mi no sa con pa interpreta mi colega su gritonan di desesperacion. Niun momento so mi a fungi como coordinador di gobierno, mucho menos di un minister. Al contrario, mi ta eherciendo mi trabou activamente y kisas ful diferente di loke mi colega ta custumbra cu ne. Paso si nos kier papia di coordinador di gobierno, e no mester bay mucho leu di cas, ya cu e mes tin un colega, cu si tabata haci dos funcion, unda cu su compania a cobra un suma enorme di placa como consultancy. Y ey tin hasta prueba! Ta varios colega di sra Wyatt Ras a echa baina, haciendo mal uzo di nan poder, cobrando placa di pueblo pa proyecto y compania propio, door cu e den su rol como parlamentario di su gobierno, no a haci su trabou manera mester ta y controla e fondonan di pueblo”, parlamentario Sue-Ann Ras a finalisa bisando.