Fraccion di AVP dilanti porta di Parlamento diamars mainta a expresa preocupacion enorme na Presidente di Parlamento en conexion cu sospecho y acusacion serio contra Parlamentario di fraccion di MEP, Endy Croes. Sospecha di ta violando leynan di admision na Aruba. Un peticion a bay na Presidente di Parlamento, Ady Thijsen pa asina cuminsa un investigacion urgente y pa haya aclaracion riba e acusacion fuerte y castigabel cu tin actualmente den direccion di Croes.
Parlamentario mr. dr. Arthur Dowers di Fraccion di AVP a bisa cu e carta a bay mesora na Presidente di Parlamento pa e pidi aclaracion na Minister Presidente, cu ta esun responsabel pa Visa y entrada di turista na nos Isla, como tambe na Minister di Husticia, cu ta responsabel pa admision y expulsion di stranheronan for di Aruba.
Motibo di e carta entrega awe mainta ta relaciona cu informacion circulando algun dia caba di un carta cu lo a yega procedente for di Hulanda, for di Embahada di Hulanda na Washington DC, unda ta sospecha un persona envolvi den traficacion di hende. Traficiacion caminda ta laga hendenan di otro pais drenta nos isla y keda aki den forma ilegal. A bin resulta cu ta acusa Parlamentario Endy Croes. Parlamentario Arthur Dowers a sigi bisa cu ta na Minister President y Minister di Husticia awo pa bin dilanti y duna cara, aclaria e carta aki, pasobra e carta ta na Aruba.
Lamentabel ta cu e mesun Parlamentario aki ta esun cu ta pusha pa un mocion den Parlamento pa urgi gobierno y departamentonan pa facilita y\of agilisa e procedura pa admision di personanan na nos isla pa motibonan deportivo.
Tur indicacion of sospecho cu tin awo akinan, via un carta cu a bin for di Departamento di Relacionnan Exterior di Reino Hulandes, cu e Parlamentario aki ta haciendo mal uzo di e asunto aki, pa asina laga hende drenta y keda nos pais. No por bisa ainda si e ta haci esaki cu of sin consentimento di Minister Andin Bikker di Husticia.
Endy Croes no ta desconoci, den pasado a comete diferente infraccion contra ley y a scapa di nan, pero a comete varios actonan sospechoso mal uzando su poder, pa faborece su mes y su famia, pesey no ta straño cu e acusacionnan serio aki den su contra resulta di ta berdad.
Parlamentario Dowers a bisa na final, cu ta exigi claridad riba e carta aki. E siguiente paso pa fraccion di AVP ta pa bay Ministerio Publico, pasobra e Gobierno aki no ta contesta ningun di e preguntanan cu ta entrega na nan. E ta keda na oposicion mes pa haci tur investigacion pa por keda cla.