Diahuebs mainta ex Parlamentario Melvin Tromp, actual vocero di Partido, a habri di biaha riba e topico di acusacion serio contra Parlamentario di MEP Endy Croes. E ta asombra di tuma nota di e silencio hermetico cu tin riba henter e asunto aki, tanto di Gobierno como di e Minister di Husticia en cuestion. Tur esaki na momento cu a manda pregunta relaciona cu e carta di investigacion y por a constata cu te ainda no tin ningun contesta.
Melvin Tromp ta considera e defensa y\o hustificacion cu e sospechoso en cuestion a duna como uno fofo, na momento cu Embahada di Reino Hulandes ta manda un carta dirigi na Pais Aruba pa pidi un investigacion riba su persona.
Un lastima di tende Rocco Tjon lider di fraccion di MEP, un persona cu a traha hopi tempo den e mundo di husticia, awe ta cuestionando e ex minister di husticia, bisando cu esaki no ta cualifica como “Mensenhandel” of “Mensensmokkel”. Locual ta e diferencia regarda bou di henter e asunto aki ta bon conoci, pero lamentablemente mester bisa Tjon si cu ex Minister di Husticia Dowers sa e diferencia ora bo ta representa husticia como empleado y kico ta e casonan ora bo ta envolvi den Pedofilia! Usando argumentonan baho pa respalda su colega di partido, caminda nos tur por compronde cu “Ons kent Ons” pa den e forma aki pa defende otro pa ora tin e tipo di fechorianan aki.
Tromp ta sigi bisa, pa locual ta trata Endy Croes, na momento cu e noticia a plama, cu pueblo a compronde exactamente cu e persona aki lo tabata envolvi den un caso, caminda e tabata firma y den su defensa mencionando cu no ta solamente pa un grupo chikito pero papiando di alrededor di dos mil persona, caminda supuestamente e lo a firma pa e personanan aki. Croes ta menciona tambe cu den nan tin algun di nan cu a keda atras, pero e lo mester bay atende cu nan.
E carta aki ta data for di 2017 segun por a compronde, mientras nos ta den luna di april 2019. Un splicacion ta na su luga pa mustra pueblo ta con por ta posibel cu despues di dos aña ainda no por a yega na e personanan aki cu Endy Croes a trece Aruba.
Tromp ta bisa: “ Con por ta posibel, cu hende cu ABO a trece Aruba, cu ABO a permiti pa nan keda na Aruba den un forma Ilegal, cual varios di nan a wordo gara haciendo trabounan den forma Ilegal na Aruba, te cu tin varios di nan deporta y cu esaki a conduci na deportacion ainda no tin claridad. Netamente esaki ta locual a conduci na e carta , na momento cu e deportacion a tuma luga y Embahada Hulandes ta haya informacion di personanan ilegal permiti di keda riba nos Isla.
Un cantidad di dos mil persona ta e cifra menciona door di Endy Croes, personannan cu tin di haber cu Ekipo di Softball, Tromp ta puntra si e ta kere cu pueblo no tin celebro. Un ekipo di Softball consistiendo di un maximo di 24 hungado, mientras Croes ta papia di dos mil y piko hende, cu ta nifica cu riba algun shen ekipo di softball, pensando cu e por burla un biaha mas di e pueblo aki uzando esaki como defensa. Dunando indicacion cu e politiconan aki ta politiconan cu ta cumpra corocoro pa guli awa!
Den e caso aki no ta pa Endy Croes guli awa pero pa e guli su mes un scupi di susto na momento cu henter e casio y informacion a sali, y cu lo tin mas informacion ainda pa bin afo. Sigur na su luga tambe pa Ministerio Publico pone atencion, cu no ta “indianen verhaal” pero su propio palabranan uza como defensa, dunando di conoce cu e tabata envolvi berdad den e caso aki, firmando pa personanan aki bin Aruba y caminda hendenan a keda y traha den situacion ilegal riba nos Isla. E forma cu e kier crea su defensa ta mustra claramente cu e ta consciente di locual e ta haci.
Pregunta na minister di husticia Andin Bikker, mirando cu henter e situacion ta dunando un indicacion unda y ken tur ta envolvi , kico ta e motibo cu Bikker no a “treed op” manera mester ta como Minister di Husticia. Un miembro di fraccion cu ta sostene e coalicion aki cu lo a burla nos sistema y leynan. Kico ta e motibo cu Bikker a sinta den un silencio cu e carta aki data di aña 2017.
Pa finalisa Melvin Tromp ta remarca cu e defensa cu Endy Croes kier a crea, cu locual e la haci tabata algo normal, como tambe ricibiendo sosten di parlamentario Rocco Tjon ( ex miembro di cuerpo policial ) mester por tabata sa e diferencia na momento di purba defene fechoria asina aki. Mientras otronan ta encarcela pa comete actonan igual na esaki, caminda nan a para garantia pa hende caminda nan a keda y a haci trabounan ilegal riba nos isla.
Partido AVP ta para y cuestiona e tipo di actonan aki. Tin cu duna pueblo e ora e contesta ta dicon otronan si ta encarcela y tin cu paga consecuencianan grave pa e mes un motibonan aki mientras Endy Croes ta burla di husticia cu sosten di colega y lider di Fraccion Rocco Tjon. Ta keda e ora pa nos wak ta cua di e instancianan lo tin e curashi pa cuminsa actua riba e tipo di cosnan aki, riba un husticia selectivo riba nos pais caminda siertonan ta wordo condena y otro tin ex polis ta sali na su defensa. Ministerio publico ta dispone di tur informaciona y ta spera di lo actua riba esaki pa asina kita e incertidumbre riba e silencio hermetico cu tin na e momento aki riba e caso aki