Home Local Inscribi pa calendario di actividad pa Dia di Rey

Inscribi pa calendario di actividad pa Dia di Rey

Oranjestad – Pa celebracion di Dia di Rey, tur organisacion por manda nan calendario di actividad pa Comision Celebracion Dianan Nacional incorpora esakinan den un solo calendario.

Dia 27 di april proximo nos ta celebra Dia di Rey, dia di cumpleaños di su Mahestad Rey Willem Alexander. Manera ta tradicion pa hopi aña caba, Aruba ta celebra cumpleaños di su Mahestad cu actividadnan den bario sea cultural, social of deportivo.

Dia 30 di april 1949, esta setenta aña, tabata tin e prome celebracion di Aña di La Reina na ocasion di cumpleaños di Reina Juliana. Desde e tempo ey nos a keda celebra Aña di La Reina riba 30 di april te cu 2013. Desde 2014, esaki ta tuma luga riba 27 di april, fecha natal di Rey Willem Alexander.

E celebracion na Aruba ta conoci pa diferente actividad manera weganan popular den bario, eventonan deportivo, e careda di Boulevard, ceremonia protocolar den Wilhelmina Park, entrega di premio Copa Hubenil Gobernador Felipe B. Tromp, mercado di buki na Biblioteca, hisamento di flie etc.

Tambe hopi popular ta e baile di cinta y den pasado tabata tin aubade y cendemento di vuurwerk.

E aña aki Dia di Rey lo ta riba un diasabra y lo tin varios evento riba nos isla. Comision Celebracion Dianan Nacional ta pidi tur organisacion pa manda informacion tocante nan actividad, p’asina por traha un calendario nacional pa Dia di Rey 2019.

Por manda e informacion pa mas tarda dia 18 di april proximo na e siguiente email desfile.ccdn@gmail.com