UPP ta e ultimo partido cu lo nenga cu e ultimo remedi den e derecho universal di un pueblo ta esun di manifestacion of demostracion. Den un democracia berdadero sigur esaki ta un parti importante di e libertad politico cu mester existi, mescos tambe cu ta e otro formanan di libertad politico, manera e derecho di expresion, derecho di reunion, derecho di voto y derecho pa tin participacion den decisionnan importante.
UPP a tuma nota cu for di prome cu Dia di Himno y Bandera, lider di AVP, kende den un desesparacion y na momento cu a bira conoci cu un di su colega ex-ministro a wordo sentencia pa motibo di corupcion, a haya ta bon pa anuncia cu lo bin cu un manifestacion cu e unico exigencia pa pidi un eleccion nobo. Si durante e 8 añanan di su gobernacion, Mike Eman y su ministronan a goberna a la Nicolas Maduro, diripente e lider cu a nenga su posicion den Parlamento di Aruba, e lider cu a bisa cu e ta retira for di politica di anochi pa di dia, despues di algo mas cu un aña ta dicidi di bula baricada y presenta su mes como e salbador di Aruba. E Aruba, cu e como responsabel mayor a hinca den un cataclismo sin precedente.
Manera den algun comunicado y riba social media UPP a vocifera caba, cu UPP no por convivi cu e meta cu AVP a yama e manifestacion aki. Mientras cu 9 parlamentario di AVP den oposicion a duna un resultado pober, un prestacion hopi abou den e ultimo un aña y 5 luna den Parlamento, awor nos ta mira cu partido AVP ta scohe di biaha pa un “ultimum remedium” den derecho universal di un pueblo, sin cu a recuri na otro derechonan. Manera un bon representacion den Parlamento di esnan cu pueblo a scohe pa represente, expresa of vocifera opinion riba situacionnan den bo pais, accionnan di protesta sea riba papel of personal, manera un accion, welga, manifestacion.
UPP a ripara tambe, cu e desesparacion cu nos ta keda categorisa como uno di “quita te tu pa ponerme yo”, a uza un docente di universidad pa purba na hustifica e marcha pa libertad. Pa hustifica e deseo di Mike Eman kende parce di ta sufri di un deficiencia mental di ta lubida cos mucho liher. E docente ta purba splica cu ta un derecho fundamental di pueblo pa exigi eleccion nobo ora e no ta contento mas of e sintie engaña electoralmente. Ta uza e famoso terminologia “kiezersbedrog”, cu ta un elemento cu ta producto di e era di “populismo” cu nos ta aden. E ultimo eleccionnan sigur nos por a mira con mayoria partido, particularmente esnan cu ta di e “establishment” den un forma populista a presenta nan mes na pueblo. UPP durante e dos eleccionnan a adverti pueblo, cu tur loke cu ta briya, no ta oro. Tur loke ta wordo priminti, den e situacion penoso cu AVPOR a hinca Aruba aden, lo no por wordo realisa. Pero di ambos banda pueblo a scohe pa e partidonan cu populisticamente a profila nan mes cu promesanan falso. “Kiezersbedrog” un fenomeno cu semper tabata tey den politica, pasobra e votador den gran mayoria no ta tuma tempo pa lesa programanan di partidonan, compara y analisa kico lo ta alcansanbel y kico no. Kico ta costa placa y kico menos placa.
E docente doctor den ley estatal, ta uza e coriente di siglo 18 na Europa cu ta esun di Ilustracion y e revolucionarionan Mericano y Frances. Tabata e era tambe conoci como e “Era di Razonamento”, unda cu razon y racionalidad mester hiba nos na mira e berdadnan sunu e.o. politicamente. Saliendo for di e pensamento aki, nos mester bisa cu kier uza aki balornan asina importante cu ta procedente di e libertadnan politico di cada ciudadano, pa scohe como ultimo herment, un manifestacion cu unico intencion termina cu gobernacion y Parlamento, dor di exigi eleccionnan nobo.
AVPOR na 2009 y na 2013 a comete “kiezersbedrog”. AVP na 2017 tambe a purba di manipula e pueblo gañando parti di electorado cu cos ta bon na Aruba. Esnan sinta awor den gobierno tambe a comete “kiezersbedrog”. Pero esey ta keda na peublo pa dicidi si e ta sigui kere den tipo di politica asina, esta di “campaña ta un, y goberna ta otro” un observacion hopi scucha di un ex-politico versa den maniobranan politico aki na Aruba cu lo keda inmortalisa pa semper.
UPP ta kere si cu net AVP y su lider Mike Eman, NO tin e autoridad moral pa por yama un demostracion asina y peor ainda cu tal exigencia. Awor parce cu Mike Eman tin e pretencion di ta e Juan Guaido Arubano, lubidando con AVPOR den pasado, na oktober 2014 y mas ainda riba 27 di augustus 2015 a bati un pueblo na momento cu pueblo, di acuerdo cu e puntonan di salida di e docente berde di universidad, a sali riba caya y dilanti di centro di gobernacion a eherce un di su derechonan universal mas sagrado, esta di vocifera su opinion contra aumento descabeya di awa y e entrega di su autonomia na momento cu a legalisa Caft.
Cu e gobierno actual su maneho ta pober, caotico, sin vision, ad hoc y tin biaha cu e tendencia pa ta hole na corupcion, nos ta reconoce. Pero UPP por medio di su trabou pafor di Parlamento ta trata na laga gobierno realisa cu e mester cambia su manera di goberna.
Si esaki no sosode al final ta mesun pueblo mester paga mescos e mester paga pa un gobernacion(AVPOR) di “niet snoeien, maar groeien”, pero awor cu un elemento nobo, esta di “niet snoeien, maar knoeien en kroelen”!
Aruba, 10 april 2019
Booshi Wever
Lider UPP
Brazil 163