Gabinete Wever-Croes, cumpliendo cu innovacion den educacion, ta lansa e siman aki un proyecto innovativo pa prepara nos hobennan miho pa futuro. E Proyecto di eLearning Pilot Project ta fungi tambe como un acelerador pa implementacion di e Sustainable Development Goals (SDGs) di Nacionnan Uni. Den esaki lo mehora enseñansa, stimula innovacion y traha den forma di colaboracion. Cu e proyecto aki, lo pone innovacion den educacion central y cuminsa evalua na un manera practico e resultado di e inversion den e programa piloto aki. E eLearning Pilot Project lo cuminsa den e aña escolar nobo.
Prome Minister a enfatisa cu e Gobierno anterior durante hopi aña a neglisha inversion den educacion. Mayora scol ni sikiera tin computer. Y hopi cu si tin computer, nan no ta traha bon. Tin scol cu ta duna les di computer solamente den teoria pa motibo di falta di computer of computer cu no ta funciona. Pa Gabinete Wever-Croes, esaki den un era di innovacion, no ta cuadra cu e direccion cu Gobierno aki kier hiba educacion. Cu e eLearning Pilot Project, Gobierno di Aruba ta drecha e situacion aki y ta duna elevacion na educacion y prepara nos muchanan pa trabounan di futuro. Di e manera aki tambe, nos ta duna nos maestronan e oportunidad pa haya mas conocemento di e materianan nobo unda cu tin mester.
“Gobierno aki ta haci loke e ta bisa. Desde comienso di gobernacion, Gabinete Wever-Croes a comparti su vision pa pone e ser humano central. Den un mundo cu ta cambiando asina lihe, na unda cu mayoría di trabounan cu nos muchanan lo ocupa den futuro no ta ni existi ainda, nos mester tuma accion awo. Y asina e Gobierno aki ta tuma accion. Tin cu ta wordo tuma den stapnan grandi, y otronan den stapnan chikito. Mi deseo tawata ta cu nos por a logra esaki pa henter Aruba den un solo biaha. Pero e realidad ta cu nos mester haci esaki den fase”.
Hunto nos por haci y logra hopi. Inversion y innovacion den enseñansa ta tarea di cada ciudadano. Nos muchanan ta esnan cu mester carga nos pais e dia di mañan, y cada un di nos tin un compomiso cu nan. E siman aki, nos ta lansa e Proyecto na e scolnan na Macuarima y asina aki pone un paso mas cerca di hiba nos muchanan den futuro cu tanto nan merece.