International Monetary Fund (IMF) a publica e conclusion di nan evaluacion di Aruba su situacion financiero economico 2019.
Durante di e ultimo dos simannan, delegacion di IMF tabata na Aruba y a hiba combersacion cu diferente sector. Cada dos aña IMF ta haci un evaluacion di e situacion economico financiero di nos Pais, e asina yama “article 4 mission”. Recientemente nan a publica e conclusion di nan bishita cu ta proyecta un crecemento mas cu Gobierno mes a premira. Gobierno a premira un crecemento di 1% nominal y IMF ta premira crecemento di 2.4 % nominal cual ta noticia sumamente positivo.
Diamars 2 di April tabata Dia Mundial di Conscientisacion di Autismo, en conexion cu esaki tur Minister di Gabinete Wever-Croes y trahadonan di Conseho di Minister a bisti na blauw. Esaki ta pa duna reconocimento na ensan cu ta bibando cu autismo y lanta conscientisacion riba e importancia pa brinda miho oportunidadnan na nos hendenan special. Na e ocasion a cende luznan blauw pafo di Bestuurskantoor como muestra si solidaridad, sosten y aceptacion na personanan cu autismo
Un preocupacion enorme cu a surgi den comunidad y cerca maestronan a wordo resolvi. Diamars Team di Bureau City Inspector, InfrAruba, Polis y cu cooperacion di e doño di bus a percura pa kita un bus bandona for di riba tereno cerca di scol San Antonio.E bus tabata causando un molester banda di scol pa motibo cu a constata cu hobennan tabata freceuenta esaki pa haci uzo si substancianan ilegal y actonan inapropia. Departamentonan di Infra a percura pa actua dibiaha pa resolve e situacion aki
Diahuebs a inicia e BID walk pa remediacion di Parkietenbos.
Pais Aruba ta confronta pa varios aña caba, cu problema serio pa locual ta maneho di desperdicio cu ta tuma luga den forma irresponsabel, poniendo salud di nos ciudadano na peliger. Varios compania internacional y local ta participando y durante e dos dia nan a ricibi recorido y presentacion pa percura cu nan tin tur informacion necesario di locual cu nan mester tene cuenta cune. Cada compania lo mester manda nan proposicion pa Gobierno di Aruba pa e remediacion y alocacion di Parkientenbos.
Actualmente ta canando dos diferente trayecto pa locual ta infrastructura. (1) construccion di caminda nobo y (2) mantencion y renobacion di camindnan existente.
E siman aki a tuma luga construccion di caminda di asfalt na Hooiberg, un bario cu pa hopi tempo tabata sufri di molester di stof awor por bisa ayo na e problema aki. E trabounan ta sigui tur siman y e team di DOW ta trahando den barionan rond Aruba. Mester menciona cu e siman cu a pasa trabounan di preparacion a inicia den vecindario di Roncado y Paradera. Habitantenan den e becindarionan aki tambe pronto por bisa ayo na e stof cu pa hopi aña tabata causa molester.
Esaki tabata tur informacion pa e “Recap di Siman” di Ministerio di Desaroyo Teritorial y Medio Ambiente.