Oranjestad – E siman cu a pasa a tuma luga e conferencia anual di World Tourism & Trade Conference na Sevilla, Spaña.
Anualmente e organisacion World Travel & Tourism Conference (WTTC) ta organisa e prestigioso evento ‘Global Summit’ cual ta trece e sectornan priva y publico hunto pa asina discuti e asuntonan cu ta afecta e sector aki, den un forum habri. Ademas, e ta yuda eleva conscientisacion di e papel global, social y economico di biahe y turismo, cu ta atrae un atencion significante di tur tipo di media globalmente.
Pa e ultimo añanan, esaki a inclui participantenan manera presidente y ministernan di diferente pais, gerencianan y ehecutivonan y mas cu 100 miembro di medianan global. E evento exclusivo aki ta duna oportunidad pa topa, comparti y netwerk cu e veteranonan profesional den e industria aki.
Un di e personanan importante cu tabata presente e aña aki ta Sr. Ewald Biemans, cu ta e director di Bucuti & Tara Beach Resort Aruba, y cu ta conoci den nos comunidad pa semper innova y eleva conscientisacion pa loke ta trata nos medio ambiente y desaroyo sostenibel. No solamente e ta corda nos di e importancia di esaki, pero tambe ta siña nos con ta pone esaki den practica!
E aña aki, e summit su tema central tawata ‘changemakers’ – esnan cu ta percura pa un cambio significante den loke nan ta para p’e. Emprendimiento, creatividad, innovacion, diversidad y inclusividad (inclusividad di mas persona) tawata puntonan cardinal di e combersacionan durante e conferencia.
Den e ‘Tourism for Tomorrow Awards’, Sr. Ewald Biemans a ser nomina como un di e tresnan pa e prestigioso Climate Action Award y a briya cu e premio mayor. Algo unico pa Bucuti & Tara Beach Resort y pa Aruba!
Den e seccion, e di dos finalista tawata; ‘The Brando, Tetiaroa Private Island’, procedente di French Polynesia’ y e di tres finalista tawata ’Tourism Holdings Limited’, procedente di New Zealand’.
A.T.A. ta tuma e oportunidad pa felicita Sr. Ewald Biemans cu un otro logro asina importante! A.T.A. sigur ta orguyoso di por traha serca cu Sr. Biemans y di por conta cu su vision y su dedicacion.