SAN NICOLAS – Sra. Meverly Romano, mayor di dos hoben ta bisa cu mayornan mester compronde nan yiu nan personalidad pa por yuda nan den nan debilidadnan. Romano kende a asisti lectura cu tambe a tuma luga na Biblioteca Nacional San Nicolas a hay’e un charla hopi interesante, “Y mi ta recomenda tur mayor y asta hobennan pa atende tipo di charlanan aki.”
“Sra. Sharleen Tromp ta haci un bon trabou pa cu esaki, splicando e categorianan di personalidad di e rasa humano, como nan parti fuerte y parti debil, permitiendo bo reconoce bo mes, na prome luga. Si bo ta mayor di un of mas yiu y bo tin bo pareha, una bez bo reconoce primordialmente ken abo mes ta, bo ta siña reconoce di nan y con pa trata di manera mas efectivo cu bo sernan keri, reconociendo nan partinan fuerte y nan partinan debil.”
“Anto e ora como mayor, bo ta siña tambe con pa yuda bo yiu atende cu su partinan debil, por ehempel den mi caso mi tin un yiu di un personalidad y e otro ta di personalidad opuesto. Un ta mas un ‘talker’ cu gusta papia y e otro ta mas trankilo. Hopi biaha na cas, nan ta pega cu otro pa motibo di e diferencia di nan personalidad. Pero cu e tipo di charla nan aki, bo ta haya un miho bista di con nan personalidad ta hinca den otro y con pa trata cu ne.”
“Mi yiu chikito awo ta den un fase unda e ta den HAVO 3 y tin cu bay scoge un profiel y e tin cu bay kies un profiel pa HAVO 4 pa sigui como su ‘examen vakenpakket’ pero e ta indeciso y no sa exactamente kico e kier bay sigui studia. Pero door cu awo ami sa su tipo di personalidad, ami como mayor tin cu yude den su debilidad – cual un di e debilidadnan di su tipo di personalidad ta ‘ser indeciso,’ – pa e por logra yega na un decision cu ta asina importante pa su futuro.”
“Y asta mi ta haya cu tur docente na scol mester haya e charla aki, pasobra tur docente mester por reconoce ki tipo di mucha nan tin den nan klas. Tin mucha cu ta mas ‘hyper’ cu otro, tin cu ta mas trankilo, tin cu ta dificil y esakinan ta hermentnan pa siña con pa atende cu cada personalidad den nan klas.”
Hoben studiante, Srta. Charity Yarzagaray: “Mi ta sinti mi mas sigur despues di a scucha e lectura.”
“Mi tabata tin dos futuro profesion den mente, mi ta entre studia pa bira un Architect of un Trahado Social pero awo mi ta sinti mi mas convenci, cu Trahado Social ta e miho opcion,” Charity Yarzagaray studiante den examen klas na Abraham de Veer School a bisa.
“Mi yiu muhe ta net den e fase pa caba nivel secundario y ta indeciso kico e kier studia, p’esey mi a bin y a trec’e cu mi tambe pa nos bin scucha hunto pa guiya nos mas leu den e proceso aki,” Sra. Tamara Yarzagaray, mama di Srta. Charity Yarzagaray a bisa.
“E resultado ta tremendo. Mi tin 6 yiu y como mama bo mester sa ki personalidad cada un di nan tin, e ta yuda bo como mayor pa trata cu nan di manera corecto. Manera nan ta bisa, no kibranan, pero pa construi bo yiunan, paso tur mayor kier bon pa nan yiu. Mi yiu muhe Charity ta un bon scuchado y e ta hopi accesibel. E ta conta mi con muchanan ta bin cerca dje na scol y cont’e henter nan bida y e ta scucha nan y wak ki bon conseho e por duna nan. Despues di a scucha e lectura di awe, mi a bis’e cu e direccion ta mustra mas pa Trahado Social.”