Prome Minister Evelyn Wever-Croes durante siman aki, a reuni cu Directiva di Club Kibrahacha 60+. Un di e puntonan principal di discusion tawata tocante Ouderenraad. Den vision di Gobierno di Aruba, Ouderenraad ta importante y e institucion di esaki pronto lo wordo concretisa. Ouderenraad ta e comision di nos grandinan cu lo consisti di personanan cu ya a baha cu pensioen, 60+. E intencion ta pa e Ouderenraad duna Gobierno conseho cu ta na interes di nos grandinan. E comision lo duna conseho na Gobierno sea Gobierno pidi conseho of no.
Gabinete Wever-Croes ta kere den un Ouderenraad cu lo funciona como un instituto consistente cu lo vigila mas di cerca e cuido di nos grandinan y tur loke cu ta importante pa nos ciudadanonan di edad mas grandi, cu na nan turno lo informa Gobierno y tene Gobierno skerpi riba e puntonan aki. Ya pa basta tempo, Gobierno ta buscando e miho formula pa pone den ley, institucionalise pa garantisa cu e ta keda duradero y structural bou di tur gobiernonan. Di e manera aki tambe ta garantisa cu nos grandinan semper tin un bos den maneho di Gobierno. Ta den fase final pa institui e comision di Ouderenraad pa despues traha e ley y busca hendenan cu lo forma parti di e comision. Ya caba tin interes ta drenta pa esaki.
“Mi ta contento cu nos pensionadonan, cu apesar cu nan a baha cu pension, nan tin e interes, disponibilidad y especialmente e compromiso pa sigui yuda nos pais cu e conocemento y experiencia cu nan a adkiri durante añanan. Gobierno tin mester di nan conocemento y experencia di nos grandinan”, Prome Minister a duna di conoce.
Prome Minister a expresa di a desea di tawata por a realisa e vision aki mas prome. E prome lunanan di e 15 lunanan di gobernacion tawata sumamente dificil pa realisa hopi cosnan debi na con bruha a encontra tur cos, no a haya un traspaso debido na unda cu mester a traha tur file di nobo. Y despues enfrenta e situacion financiero cu tawata desconoci pa nos, pa CAFT, y desconoci pa tur hende. Pero despues di hopi trabou y esfuerso, e situacion ta poco mas stabil, cu palabracion haci cu Hulanda, y nos ta bayendo riba e bon rumbo pa cumpli cu e partinan aki di vision di Gabinete Wever-Croes.
“Nos grandinan ta importante pa nos y awo nos ta bay duna nos grandinan e bos cu nan tin mester tambe den gobernacion”, Prome Minister Evelyn Wever-Croes e enfatisa.