Parlamentario Endy Croes a amplia riba un reunion publico teni den Parlamento di Aruba diaranson ultimo. Durante e reunion aki Parlamento a trata e Landsverordering op het Notarisambt (AB 1990 no.GT 69). E ley Notarisambt ta reglamenta entre otro cuanto “Notaris” pais Aruba por tin ta trahando. E ley mes ta uno hopi anticua data di aña 1868 y porcierto tin 151 aña bieu. Parlamentario Croes a splica tambe cu e ta agradeci y admira con 151 aña pasa huristanan a traha un ley asina bon hinca den otro cu a permanece te cu awe. Mas cu claro cu crecemento di poblacion y diferente otro aspecto mas ta tempo pa modernisa nos leynan. Sinembargo pa awor a haci algun cambio cu lo yuda haci e proceso mas liher y den futuro cercano un werkgroep cu Minister Andin Bikker lo institui cu participacion di tur stakeholders lo propone un cambio di e ley por completo. Un ehempel ta e ley notarisambt di Corsou a wordo ful modernisa na aña 1994 y por bira e “leidraad” pa e renobacion di esun di Aruba
Cambionan den e ley di notaris
Diaranson ultimo algun aspecto importante cu a wordo cambia den e ley aki ta e aumento pa mas cupo pa mas Notaris. Esaki ta actualmente 4 Notaris total pa Aruba y awor esaki a bira 7 Notaris total pa Aruba. Otro punto ta e edad cual nan ta yama edad di retiro (ontslag) di Notaris, esaki a subi di 60 pa 65 aña. Mesun momento a bin cu un mocion pa mara esaki na e edad di ‘wettelijk pensioen’ unda den e modernisacion total esaki lo bin na vigor. Parlamentario Croes ta sigui splica despues cu nos a sinta cu tur 4 Notaris den un reunion den Parlamento algun siman atras den un vaste commissie y nos por a destila algun preocupacion cu tabata duna señal di urgencia pa bin cu un nota di cambio. Momento cu Notaris ta pasa un akte constantemente mester yama dos secretaria pa bin sinta como testigo y esaki ta usa practicamente hopi ora di dia cual ta stroba dicho secretarianan di nan funcion regular. Na Hulanda y Corsou esaki ya no ta asina, cu excepcion ora ta pasa un Testament. Pues e cambio aki tambe a bin den un nota di cambio y a aregla esaki conforme Hulanda y Corsou.
Aruba cu propio Testamentenregister
Un otro aspecto importante cu a keda regla den e ley ta lo siguiente. CRT cu ta e Centraal Testament Register ta estableci na Corsou y esnan cu tin experencia cu esaki momento cu un familiar fayece ta un caminda di cruz pa manda busca esaki na Corsou. Den un otro nota di cambio a percura pa regla esaki tambe pa mas eficiencia y pa mas rapidez. Aruba lo bay over pa por tin su propio Electronisch Testamentenregister. Basicamente desde Status Aparte na 1986 y como cu werkgever tabata limita a decreta e tempo aya un lista di ley di Antiyas cual lo bira tambe pa Aruba pendiente cu e wordo regla. Esaki ta e asina yama positieve Lijst. Pa algun rason a lubida di pone e Testamentenregister den e positieve lijst aki. Cu e cambio aki ta corigi esaki y Aruba awor por tin su propio Testamentenregister. Parlamentario Endy Croes ta termina bisando cu nos ta consciente cu tin mas “bottlenecks” cu mester atencion pa haci e proceso mas lihe den su totalidad pero ta sumamente contento cu nos por a dal e promer stap aprobando e ley aki cual lo duna e chispa pa jump start nos economia. Ademas a pasa un mocion di Colega Howell cu e deseo pa un di e Notarisnan habri nan oficina pariba di brug.
Pabien Coalicion cu e cambionan aki. Futuro cercano lo cuminsa mustra e frutanan di e cambio aki, Croes ta termina bisando.
