ORANJESTAD – Diahuebs anochi Minister di Deporte sr. Dangui Oduber a bishita Flatstone Ballpark na Piedra Plat unda e mandatario a sende e lusnan simbolicamente. E lusnan na veld di Flatstone pa basta aña tabata den mal estado, dirigentenan no tabata haya oido di gobierno anterior. E gobierno aki si a duna atencion na e problema y awe por bisa cu tur e lusnan a wordo restaura y e veld tin un iluminacion por completo atrobe. E trabounan aki a wordo realisa cu fondonan di Ministerio di Turismo Salubridad Publico y Deporte.
Veld di Flatstone ta conoci na Aruba pa practica e deportenan di baseball y softball. Den menos di 2 siman di tempo 2 veld ta haya atencion debido di Gobierno, veld di Kudawecha y awor veld di Flatstone.
Deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida. Pa e motibonan aki, Minister Dangui Oduber ta haya importante pa deporte na Aruba haya e atencion debido.
Minister Dangui Oduber ta sigui cumpli apesar cu e fondonan pa deporte ta hopi limita, asina mes a haci hopi pa deporte. E mandatario a menciona cu a yuda diferente clubnan cu material, airco y awor iluminacion. Intencion ta pa poco poco drecha den tur bario caminda tin necesidad pa cu deporte.
Minister Oduber kier a gradici e dirigentenan di e veld di Flatstone pa tur locual nan a haci pa deporte na Aruba y ta deseanan tur clase di exito pa den futuro. Esaki ta un otro ehempel bibo di con gobierno y sectornan priva ta traha hunto na bienestar di deporte y e comunidad di Aruba.