Partido MEP a tuma nota di un comunicado recien di mr. dr. Ryçond Santos do Nascimento, un experto den derecho constitucional y structura estatal den cual el a reacciona riba un comunicado emiti pa lider di fraccion di MEP, sr. Rocco Tjon dia 27 di maart 2019 y caminda e profesor aki ta insinua cu cierto palabranan a wordo uza manera “bende autonomia”, siendo cu nunca e lider di fraccion di MEP a papia di “bende autonomia” pero a papia solamente di “entrega di autonomia” door di Gabinete Eman y fraccion di AVP.
Entrega di nos autonomia
Pa trece henter e asunto aki den contexto real, partido MEP a comprende cu sr. Santos do Nascimento na april 2018 a manda un conseho pa Parlamento den cual e ta confirma cu pa varios motibo constitucional e ta critico pa cu institucion di CAft pa Aruba y cu e ley aki a wordo traha bao di menasa di un intervencion pa medio di un KB.
Ta di aprecia cu – despues di casi 5 aña di e KB aki imponi riba Aruba y casi 4 aña cu e ley di LAft a bin na vigor cu aprobacion di e mayoria di AVP den Parlamento (fraccion di MEP a vota Contra!) – awe un sostenedor directo di AVP y Mike Eman, esta sr. Santos do Nascimento un biaha mas ta trata di habri wowo di dirigentenan di AVP cu nan a comete un eror historico pa no bisa traicion contra nos pueblo y esaki na momento cu sr. Santos do Nascimento mes ta declara den su conseho di april 2018 :
“Het is enigszins merkwaardig dat de Arubaanse wetgever (regering en parlement gezamenlijk) bij deze landsverordening besloten heeft om ter realisering van duurzame openbare financiën niet interne maatregelen te treffen. In de plaats daarvan heeft de Arubaanse wetgever besloten om structureel zeggenschap toe te kennen aan een externe entiteit (de regering van het Koninkrijk/Nederland) over een uiterst essentieel onderdeel van de autonome sfeer, te weten de eigen economische huishouding”.
Den corto sr. Santos do Nascimento a declara bon cla cu e ta haya hopi remarcabel cu e gobierno y parlamento anterior, esta Gabinete Mike Eman y fraccion di AVP a duna autoridad na Hulanda algo cu ta un derecho autonomo, pues nan a entrega nos autonomia na Hulanda.
Malinformacion y desunion
Ta di lamenta cu sr. Santos do Nascimento ta insinua cu cierto palabranan a wordo uza manera “bende autonomia” y ta splica dicon no a bende autonomia, siendo cu nunca e lider di fraccion di MEP, sr. Rocco Tjon a papia di bende autonomia pero a papia di entrega di autonomia (‘begrijpend lezen is ook een kunst’). Cu e malinformacion aki tambe e profesor ta crea desunion y no union manera cu e mes ta proclama cu ta necesario.
Finalmente mester enfatisa cu tur locual sr. Santos do Nascimento a trece padilanti den su conseho pa loke ta concerni KB, CAft, LAft y entrega di nos autonomia ta terminonan cu no mester tabata aplicabel pa Aruba si e partido cu sr. Santos do Nascimento ta afilia na dje no a crea deficitnan astronomico desde 2010 en adelante y caminda nos a conoce deficitnan di mas di 400 miyon florin den un solo aña y cu esaki a duna tur espacio na Hulanda pa interveni den nos asuntonan interno. Pues tabata danki na e record di deficitnan aki nos pais a perde su autonomia financiero na man di Madre Patria Hulanda. Mea Culpa, AVP!
