Ministerio Publico a saca un Instruccion nobo pa ora di violencia den relacionnan.
E Instruccion nobo aki a wordo firma awe pa Procurador-General di Aruba, Alexander van Dam.
E Instruccion ta contene e reglanan pa investigacion y persecucion ora di violencia relacional.
E ta encera tambe e condicionnan basico pa e cooperacion entre Polis, Ministerio Publico, Reclassering y otro partnernan den e sector social y cuido, cualnan ta reuni den e Veiligheidshuis.
E Instruccion tin cu aporta na trabao mas efectivo y eficiente di tur e partnernan aki hunto como reaccion riba violencia relacional. Ademas e Instruccion ta sirbi como herment pa reconoce violencia den relacionnan mihor, pa stop violencia of stop e menaza, y garantiza seguridad di e victimanan.
Lamentablemente Ministerio Publico tin cu constata cu na Aruba tin violencia relacional na gran escala.
E ta un problema social.
Varios biaha comunidad di Aruba ta wordo geshock pa casonan di violencia relacional cu hechonan castigable serio.
E solucion di e problema aki ta exigi un trabao conhuntamente y riba termino largo di tur e partnernan
Ora ta trata di preveni violencia relacional, ta na e instancianan den sector di cuido y social y den enseñanza pa sali na cabez.
Ley Penal ta den e acercamento aki e ‘ultimum remedium’ pa castiga esnan cu ta haci nan mes culpable na violencia relacional.
E señal cu Ministerio Publico kier duna na comunidad di Aruba cu e Instruccion nobo aki ta cu violencia relacional mester wordo gestop y castiga.
Pesey e punto di salida ta cu den casonan di violencia relacional den cual Polis ta wordo yama, e sospechoso mester wordo deteni y (si ta posible) e mester keda den detencion.
Esey tambe si e victima no kier haci denuncia of trek in denuncia despues.
