“Inclusion ta nos prioridad”
Diamars 2 di april, Dia Mundial di Conscientisacion di Autismo, tur Minister di Gabinete Wever-Croes y trahadonan di Ministerraad a bin bisti na blauw. Esaki ta pa duna reconocimento pa ensan cu ta bibando cu autismo y lanta conscientisacion riba e importancia pa brinda miho oportunidadnan na nos hendenan special.
Inclusion di nos hendenan special ta un prioridad mas pa Gobierno di Aruba. Prome Minister Evelyn Wever-Croes desde algun luna pasa via un Ministeriële Beschikking a institui un comision cu lo enfoka riba e derechonnan y calidad di bida pa nos hendenan special. E comision ta consisti di representantenan di Ministerio di Asuntonan Social, Departamento di Labor, Departamento di Salubridad, Minister di Husticia, Minister di Infrastructura, Minister di Enseñansa y tambe di Minister di Asuntonan General.
E reprentante di Prome Minister den e comision ta señor Hans Geerman. Señor Geerman ta un persona hopi apasiona riba e tereno di hendenan special y cu amplio experencia riba e tereno aki
E maneho di inclusion di Gabinete Wever-Cores ta basa riba e “Life Cycle Approach”, Enfoke di Ciclo di Bida di un persona. Esaki ta cuminsa desde cu un persona nace cu un limitacion fisico of mental. For di aki caba mester tin un bon sistema na luga pa asisti e mayornan y of e cuidador di e muchanan. E siguiente stap ta inclui e muchanan aki na scolnan adecua y ekipa pa cuida muchanan special. Tambe mester bin un bon plan pa despues di scol e muchanan aki tin un luga bon pa keda mientras nan mayornan ta traha. Ora nan drenta e edad hoben, mester percura tambe pa despues cu nan caba scol, nan por wordo inclui den un scol di ofishi. Tambe mester studia e posibilidad pa nan drenta scolnan regular.
Den nan edad di adulto, mester inclui nan den e mercado laboral. Algo cu lo no bay ta facil teniendo cuenta cu e presion cu tin awendia den comercio cu un economia stagna. Sinembargo Gobierno di Aruba, pa medio di e comision aki cu lo studia tur posibilidad, lo yuda den inclusion di nos hendenan special den e mercado laboral. Despues di e face laboral, ta bin tambe e parti di cuido di salud y vivienda.
“E compromiso di Gabinete Wever-Croes ta pa pone e ser humano central, no laga niun hende atras especialmente no nos hendenan special”, Prome Minister Evelyn Wever-Croes a expresa.
