ORANJESTAD – Minister Ruiz-Maduro a reuni cu sra. Milly Schwengle kende ta representa Aruba como Staatsraad den Raad van State na Hulanda. Den e Organo Halto aki na Hulanda, sra. Schwengle ta representa e interesnan di Aruba den e Departamento di Conseho. Den e reunion a repasa e esfuersonan cu Gabinete Wever-Croes ta haciendo riba e tereno financiero y economico. E mandatario a duna un relato di e reunionnan hiba recientemente cu e companianan di rating Standard and Poors’ y Fitch, e Cuentanan Nacional y tambe e evaluacion positivo di IMF su Article IV mission pa Aruba. Di e manera aki Minister Ruiz-Maduro ta spera di por brinda sra. Schwengle como representante pa Aruba tur informacion relevante pa Aruba su representacion den e organo importante aki. Minister Xiomara Ruiz-Maduro a probecha e ocasion pa brinda sra. Schwengle un regalo chikito pa semper e por tin Aruba presente durante su trabao na Hulanda.
