Riba Dia Mundial di Conscientisacion di Autismo, Prome Minister Evelyn Wever-Croes a bishita Scol Dun’un Man. Esaki, Prome Minister a considera un dia hopi bunita di por pasa cu nos muchanan special y sinti e amor cu nan ta transmiti. Minister Rudy Lampe y Minister Dangui Oduber tambe tawata presente na e mainta aki.
“Un pisca ta desenvolve su mes bon den awa. Si bo bisa e pisca pa subi un mata riba tera, e lo no logra. Si constantemente bo ta reclama y huzga e pisca, pasobra e no por subi e mata, e pisca lo pasa henter su bida pensando cu el a faya”.
Esaki ta un comparacion cu Prome Minister a duna awe durante su bishita na Scol Dun’un Man pa enfatisa cu cada ser humano tin su habilidadnan cu e ta bon den dje. Hendenan cu autismo tambe. Ta tarea y mission di nos tur ta pa haya sa kico nos hendenan special ta bon den dje y duna nan e sosten pa nan sigui desaroya y bira miho. Ban busca e bon den cada hende, y encurashe pa e ta miho, hasta si e ta total diferente na otronan.
Maneho di inclusion di Gabinete Wever-Croes ta dirigi riba e ciclo di bida di cada ser humano. Pa no laga niun hende atras. E maneho di inclusion ta cuminsa desde nacemento, cu e mucha mester tin atencion special di su mayornan, kendenan tin mester di sosten special tambe. Ora cu e mucha tin e edad pa cuminsa scol, e mester haya e ensiñansa cu e merece. Pa estudio avansa, lo percura hopi lihe pa e grupo di mucha aki haya mas oportunidad. E siguiente fase, ta pa habri mas oportunidad di trabou y duna nos hendenan special e sosten y guia pa nan mantene nan trabou. Den e periodo cu nan bira mas grandi, tambe nan tin mester di mas sosten y cuido y un vivienda.
Prome Minister a encurasha docentenan y mayornan cu ta cuida nos muchanan special pa nan sigui haci e trabou cu animo. Muchanan special ta muchanan cu tin habilidadnan special. Pero maestro y mayornan cu ta atende cu nan, mester tin habilidadnan hopi mas special ainda. Cualidadnan manera pasenshi, determinacion, hopi dedicacion, y especialmente un curason hopi grandi. Den number di Gobierno di Aruba, Prome Minister a gradici docentenan di Scol Dun’un man y mayornan cu ta sostene nos muchanan special. Danki pa kere den nos muchanan y pa busca e miho den nan.
