Oranjestad – Diabierna siman pasa Departamento di Cultura Aruba (DCA) a ricibi bishita di e escritor y autor di e buki titula ‘E Caya di Monche’, sr. Benjamín Romero cerca e director drs. Siegfried Dumfries y sr. Stanley Dabian, PR y Comunicacion na DCA. E tabata un momento ameno caminda cu sr. Romero a splica na representantenan di DCA tocante a buki aki cu ta trece tres componente clave dilanti esta biografia, historia y genealogia di historia di famia. ‘E Caya di Monche’ ta conta un etapa di bida di e papiamentista sr. Ramon Todd Dandaré, tempo di su infancia y hubentud den Elleboogstraat. Tambe e ta relata, entre otro, su formación como academico y lingüista, sigui pa su experticio den nos lenga materno.
E autor a hinca e biografia aki den un contexto histórico defini, rescatando e echo y personahe fo’i den bahul di olvido. Contrario na esun buki ‘E Negoshi di Koffie na Aruba’, cual ta prome obra di e autor aki. E obra ‘E Caya di Monche’ ta menos periodistico y mas literario.
El a splica cu e ta describi e comunidad singular cu a biba den Elleboogstraat entre 1940 y 1965. E tempo ey nan a comparti cu otro no solamente nan idioma, sino tambe nan cultura, tradicion, custumber, gastronomia y mas. Den e obra aki el a skirbi cu tin di haber cu presencia di e prome ola di inmigrante Latino Americano cu a bin establece nan mes na Aruba. Y tambe di otro nacionalidad cu a biba hunto den e caya marginal aki cu ta den pleno curason di Oranjestad, Playa manera nos ta yam’e.
Na final sr. Romero a entrega dos ehemplar di e buki ‘E Caya di Monche’ uno na
Sres. Dumfries, director di DCA y otro na Dabian, PR y Comunicacion na DCA.
Drs. Siegfried Dumfries, director di DCA ta aplaudi e iniciativa di e escritor y autor sr. Benjamín Romero cu a skirbi y dedica un buki ‘E caya di Monche’ na un bario di Aruba cu ta Rancho. Dunando reconocemento special na sr. Ramon Todd Dandaré, Mag. Ling y historia di su Caya Elleboogstraat caminda el a lanta. A gradiciele pa su aporte na nos literatura den nos dushi idioma Papiamento y deseando e tur clase di exito.
