Oranjestad – Diasabra 27 di april nos ta celebra un bes mas Dia di Rey, dia di cumpleaños di S.M. Rey Willem Alexander.
Pa hopi aña e celebracion di cumpleaños di Reina y actualmente di Rey den nos comunidad ta conoci cu actividadnan cultural, weganan popular y eventonan deportivo.
E celebracion conoce tambe su eventonan oficial manera entrega di condecoracion real na ciudadanonan door di Gobernador di Aruba y e ceremonia protocolar den Wilhelmina Park. Aki por conta cu presencia di miembronan di Marina Real y gruponan hubenil uniforma di scouting.
Ta un tradicion cu Presidente di Parlamento ta expresa palabranan di felicitacion na ocasion di cumpleaños di Su Mahestad na nomber di comunidad Arubano.
Desde 1992 ta entrega tambe e Copa Hubenil Gobernador Felipe B. Tromp na un hoben of grupo hubenil cu a destaca durante e ultimo aña. E ganado sea individual of grupo lo mester a destaca durante e ultimo aña riba tereno social, cultural of deportivo pa bini na remarca pa e premio. E edad pa ser nomina ta di seis pa binti aña. E lidernan di un grupo por ta adulto, pero pa e premio ta considera e miembronan hubenil.
Na aña 2018 e premio a bay pa e rumannan Chiara y Sophia Petrocchi pa nan dedicacion y logronan den e deporte di Taekwondo y Judo.
Tambe e comision ta otorga dos premio di estimulo.
E celebracion den Wilhelmina Park ta ser coordina pa Comision Celebracion Dianan Nacional y Comision Copa Hubenil Gobernador Felipe B. Tromp.
