Oranjestad: Diasabra algo prome cu 12’or di merdia, alarma ta wordo bati pa un caso hopi serio den cual dos mucha hopi chikito a drief den nan float y a bay basta leu for di costa.
E muchanan tabata cu nan mayornan pasando dia na e beach net pazuid di e crusada Adriaan Lacle Boulevard. Aparentemente pa un descuido chikito y biento fuerte lo a manda e muchanan leu den lama.
E shuttle boat di Renaissance tabata pasando cu tres empleado abordo, nan a compronde kiko ta pasando y mesora un di nan abordo a bula na awa y asina a logra salba bida di e baby cu tabata drief den basta leu for di costa.
E tres personanan local, empleado di Renaissance tabata Marcelo Heyden, kende a bula na awa pa salba e baby, tambe Egbert Brete y Richard Flanegin, e dos ultimonan aki a keda den e boto pa asisti y ta pendiente di nan colega y e baby.
Den e boto tabata tin tambe guest di Renaissance hotel cu a mira full e accion di rescate di e baby.
Despues cu e empleadonan di Renaissance a logra saca e baby for di lama, nan a hibe pa su mayornan. E otro yiu chikito tambe a bay afo, pero e tata mes a logra gar’e y trece bek tera. Esaki tabata un momento di hopi angustia cu Danki Dios a caba felis.
Presencia di ambulance a wordo pidi na e sitio y despues cu e paramediconan a controla e muchanan y nan tabata bon, nan a atende cu e mama di e dos muchanan, kende a bay den panico na momento cu su dos yiunan chikito a drief bay afo. Tur tres a wordo atendi na e sitio mes.