Biniendo di e veld di enseñansa Parlamentario Sue-Ann Ras ta sumamente satisfecho cu e logro di Gabinete Wever Croes cu e instalacion di e facultad mas nobo: SISSTEM na Universidad di Aruba. Parlamentario Ras ta cuminsa na indica, cu na mundo actualmente e complexidad ta aumentando, unda exito no ta depende solamente pa loke bo sa, sino cu loke bo por haci cu tur loke bo sa. Ta di sumo importancia pa ekipa nos hobennan cu conocemento y habilidad pa resolve e problemanan, compila y evalua evidencia y crea un sentido di informacion. “Esey ta netamente e tipo di habilidad cu nos studiantenan tambe tin mester, door di studia ciencia, tecnologia, ingenieria y matematica, cu ta materia colectivamente conoci como STEM”, Ras a sigui bisa.
Inversion casi perdi
Un excelente oportunidad y inversion di 13.05 miyon Euro den enseñansa avansa, di cual casi Aruba a perde, si no tabata pa e accion relampago di e gobierno actual. Awo Facultad di Ciencia, Sostenibilidad, Ingenieria y Matematica, SISSTEM na Universidad di Aruba a bira un realidad, despues cu Minister di Finansa mr. Xiomara Ruiz-Maduro a firma e Acuerdo di Financiamento cu Union Europeo, cu ta un regalo di Union Europeo.
Segun Parlamentario Ras, e aspecto di haya colaboracion tecnico y profesional ta di sumo importancia pa cualkier proyecto por ta exitoso y duradero. P’esey ta di aplaudi cu UNDP y KU Leuven a firma tambe pa brinda asistencia den renobacion di e edificio Maria Convent, unda e facultad lo residencia como tambe traha e respectiva curiculo.
Curiculo basa riba STEM
“Un curiculo cu ta basa riba STEM tin e situacionnan di bida real pa yuda e studiantenan siña. E programanan manera ingeniera pa mucha ta integra multiple les pa proporciona e oportunidadnan pa mira e conceptonan relaciona cu bida, cu speransa di lanta curiosidad y pasion den un futuro carera den e veld di STEM. E actividadnan di STEM ta provee e lesnan ‘hands-on and minds-on’ pa e studiantenan. Haciendo tanto matematica como ciencia dibertido y interesante, ta yuda e studiante pa haci hopi mas cu djis siña reproductivo, manera ta e situacion actual”, Ras a elabora.
E necesidad di STEM
Tur hoben mester ta prepara pa pensa critico, profundo y analitico y pa haci esey nan mester tin e oportunidad di bira innovador, educador, investigador y lider cu por resolve e retonan dificil cu nos pais y mundo ta confronta tanto den presente como den futuro. Y awo Aruba tambe tin e acceso pa brinda enseñansa STEM di calidad na nos hobennan.
“Un palabra di pabien y gradicimento na henter e ekipo di Union Europeo, Universidad di Aruba, KU Leuven, UNDP, specialmente e ministernan Xiomara Ruiz Maduro y Evelyn Wever Croes cu e paso di innovacion aki na Aruba. Nos studiantenan awor tambe tin e excelente posibilidad di gradua cu Bachelors den STEM, Masters den Sustainability y Phd den Innovacion” Ras a finalisa bisando.