ORANJESTAD – Departamento di Labor y Investigasion (DAO) ta anuncia cu lo prolonga e periodo di e encuesta dirigi riba e transicion di Estudio-pa-Empleo, cu ta hiba e nomber di School to Work Transition Survey, of SWTS 2019, te cu dia 30 di april 2019. Den lunanan di februari y maart 2019 DAO su encuestadornan a bishita adresnan rond di Aruba pa haci e encuesta, sin embargo tin mester di mas tempo pa asina logra bishita tur adres necesario. E SWTS 2019 tin como meta, genera informacion relevante y actual tocante e situacion y participacion di nos hobennan den e mercado laboral, y tambe ilustra e dificultadnan cu por presenta ora e hobennan aki drenta nos mercado laboral despues di a caba nan estudio.
E analysis di e data lo mester por demostra e puntonan fuerte y debil di nos mercado laboral, pa loke ta trata nos hobennan y mustra e motibonan di esaki durante e transicion. Lo traduci e resultadonan di e encuesta den un cuadro cu oportunidadnan pa empleo, programanan pa desaroyo y maneho pa nos hobennan.
Con bo persona por contribui?
Pa e SWTS 2019, lo saca un muestra di adresnan reparti riba henter Aruba. Si bo adres aparece den e adresnan escohi, nos ta pidibo cordialmente pa duna bo colaboracion na nos encuestador. Den e encuesta aki solamente esnan entre 15 pa 29 aña di edad lo ser entrevista y pa esaki no ta importa si e persona ta traha of no. Pa medio di e cuestionario lo haci preguntanan tocante bo estudio y trayectoria riba e mercado laboral te cu awor.
E encuestadornan lo bishita e adresnan selecta entre 8.00 a.m. y 8.00 p.m. E encuestadornan lo identifica nan mes cu un badge di DAO y lo ta bisti cu un t-shirt blauw. Den e caso cu no tin ningun hende na cas, e encuestador lo laga un carta atras cu su number di telefon. Nos ta pidibo pa por fabor tuma contacto mas liher cu ta posibel cu e encuestador pa traha un cita cune. Tambe por yama DAO pa asina traha un cita.
Privacidad
Lo trata tur informacion confidencialmente y lo publica esaki solamente den forma agrega. Departamento di Labor y Investigacion ta garantisa bo anonimidad total.
Bo informacion lo aporta na un mihor bista riba e desaroyonan di e mercado laboral aki na Aruba. Pa e motibo aki bo participacion ta di suma importancia pa e SWTS 2019.
Nos ta gradicibo di antemano pa bo participacion na e SWTS 2019. Pa mas informacion riba SWTS 2019, bo por tuma contacto cu un di nos empleadonan di e Oficina di Investigacion di Mercado Laboral (Bureau Arbeidsmarktonderzoek) na number di telefon 5237720 entre 8:00am pa 4:30pm of e-mail nos na [email protected].