Un biaha mas por mira con e parlamentario di AVP, Mervin Wyatt-Ras a perde tur nocion di realidad ora cu el a ataca e Minister di Salubridad, Dangui Oduber pa loke ta sosodiendo na Spoedeisende Hulp (SEH) na Hospital, haciendo como sifuera cu e minister actual lo mester ta sinta riba e stoelnan di Gerencia, Raad van Bestuur, Raad van Toezicht di Hospital y tambe riba stoel di Gerencia di AZV. Sin duda cu e minister actual tin bista riba henter e desaroyo den e mundo di cuido medico y si mester su persona como e mandatario encarga lo sa di interveni pa soluciona cualkier problema of disputa den e sector aki.
Un hospital di 1 biyon florin
Sinembargo ta un berguensa pa Mervin Wyatt Ras – formando parti di e cheerleadernan di AVP den Parlamento – nunca den 8 aña a habri su boca pa cuestiona henter e proyecto corupto di Hospital Nobo, incluyendo e parti di Spoedeisende Hulp. Hecho ta cu e gastonan halto y excesivo cu e proyecto aki ta costando e pueblo ta di grita yora y cu lamentablemente no ta bale la pena paga asina hopi placa pa e hospital aki. E hospital nobo tabata presupuesta pa 252 miyon florin, pero awor e ta costando caba 360 miyon florin, anto sin conta interes acerca. Ora cu e proyecto aki ta completamente cla, e lo costa riba 1 biyon florin cu e pueblo tin cu paga pa e proximo 29 añanan.
Extra gasto di 110 miyon florin
Ta increibel cu parlamentario Wyatt-Ras durante 8 aña tabata morto na soño den Parlamento y no tabata consciente cu na inicio di construccion di e hospital aki no tabata inclui e salanan di operacion, unidadnan di cuido intensivo y otro partinan vital cu mester ta incorpora den e hospital. Hecho ta cu despues cu e barco tabata pega caba, e ora ey numa mester a core inclui e salanan di operacion cu a costa 27.5 miyon florin extra y 26.2 miyon florin extra pa e parti di cuido intensivo. Ademas tabatin mas di 6 miyon florin na meerwerk. Tur esaki a conduci cu e hospital ya ta costando pais Aruba riba 110 miyon florin extra di loke el a costa inicialmente. Algo nunca bisto den historia di tur e construccionnan cu a yega di ser haci na Aruba! Pero Mervin Wyatt Ras a sostene ciegamente e bagamunderianan aki cometi pa e ex-ministernan Visser y Schwengle kendenan a traha primeramente pa nan propio interes.
Scarcedad di personal
Durante 8 aña tambe e gobierno di Mervin Wyatt Ras no a percura pa elimina e scarcedad di specialistanan na Aruba. E minister di Salubridad actual a manda pidi gerencia di hospital pa splica con leu nan ta cu e yenamento di vacaturanan di specialistanan na Hospital y a urgi pa busca activamente specialistanan, preferiblemente Arubiano den exterior y haci maximo esfuerso pa atrae nan pa Aruba. Ora t’asina leu cu yenamento di e vacaturanan, e tempo di warda pa haya un cita cu un specialista lo disminui drasticamente.
BIG, otro engaño di Mike Eman
Ora cu Mervin Wyatt-Ras ta papia di e asunto di registracion di BIG, su memoria a cay hopi cortico, ya cu tabata su lider Mike Eman na aña 2010 a bay te Costa Rica y a priminti tur e studiantenan di medicina cu e lo percura pa ora nan caba nan estudio nan diploma wordo reconoci y cu nan por cuminsa traha como medico na nan isla natal. Pero durante 8 aña Mike Eman no a cumpli cu su promesa y locual a keda atras ta un potret di Mike Eman rondona pa tur e studiantenan aki cu nan tur a wordo tuma haci. Y awor den apenas 1 aña e minister di Salubridad Dangui Oduber dentro di poco tin henter e asunto di registracion BIG regla pa e studiantenan. Pero Mervin Wyatt Ras – mescos cu ta e caso di su critica constante riba e Crisis Plan Social – kier pa tur e problemanan causa pa Gabinete Eman wordo soluciona mas pronto posibel. Mara cu e tabata tin e mesun diligencia aki durante e gobierno di AVP cu el a defende ciegamente pa 8 aña largo.