Gibbs un biaha mas a trata na di burla di nos sistema administrativo, actualmente e ta cera, e ta wordo acusa di a estafa y malversacion di mas cu mey miyon florin
Oranjestad: Rudolf Gibbs, ex agente policial, cu den pasado a haye caba dilanti mesa berde, den cual ela haya un castigo di prison, ta bolbe comete e mesun tipo di delito. Actualmente Gibbs a bolbe cuminsa cu su fechorianan di gaña y asina estafa centenares di personanan stranhero indocumenta.
Aparentemente Gibbs no a siña su les full bon, paso despues cu ela sali for di prison, anto sin sinta su castigo completo, ela bolbe cuminsa kere cu e por sigui burla di nos sistema administrativo.
Den pasado ela bay cera pa motibo cu ela falsifica varios firma, entre otro di Gobernador di Aruba, di Minister, di Hues y tambe di algun director di departamentonan di Gobierno.
Recientemente Gibbs a keda deteni, e ta wordo acusa di estafa y malversacion di placa aparentemente mas cu mey miyon florin.
Actualmente Gobierno a adapta henter e sistema di traha y a digitalisa tur e departamentonan concerni cu ta atende cu asuntonan di estranheria, nan ta trahando uni y hunto.
Den e ultimo lunanan mirando e problemanan grandi cu tin na nos pais bisiña, un gran cantidad di persona ta pidiendo asilo politico pa asina por keda Aruba. E lus di estafa a bolbe cende cerca Gibbs, ela prepara un carta standard di peticion pa asilo politico y pa e mande pa DIMAS e ta cobra cada cliente un suma di 1500 florin, aparentemente mas di 300 persona a haci uso di su servicionan.
DIMAS a pone Gibbs riba blacklist, ni asina e no a stop cu su fechorianan, pero a cuminsa manda e peticionnan por escrito. Ora DIMAS a stop di tuma su cartanan ela cuminsa usa un otro compania pa mandanan.
E tabata manipula e stranheronan cu ta desea di keda Aruba asina bon, cu e tabata cobranan y aparentemente tabata convense nan tambe cu e SI por logra haya asilo politico pa nan.
Gibbs no tabata tin man pa gana placa, te cu ela dicidi di redobla su prijs di su servicionan. E tabata cobra e compania di tramita permiso 1500, pa regla un permiso y e ta cobra e stranhero un otro 1500 florin garantisando e stranhero cu elo haya asilo politico.
E tabata malinforma e stranheronan cu tin un status “Wardando riba e contesta di e peticion entrega pa Asilo Politico,”, cu nan por keda Aruba y traha sin problema. E tabata bisanan cu si nan peticion wordo nenga, nan por apela, cu esaki ta dura y por yudanan keda pa mas o menos 1 aña y mey na Aruba sin haya problema.
E no tabata na altura of no tabata informa su clientenan, cu e sistema di DIMAS a cambia, cu tin un team nobo trahando exclusivamente riba e peticionnan aki y cu nan ta contesta tur peticion mesora.
Rudolf Gibbs ta un ex agente policial kende ta bisa cu e ta un hurista of abogado specialisa riba e tereno di permiso di estadia y trabou na Aruba.
Door di su caso di falsificacion di firma y estafa, pa cual ela wordo sentencia, cu castigo di prison. Gibbs no tin niun acceso na ningun instancia di Gobierno.
E caso aki ta un caso similar na esun di pasado, muy probablemente elo tin cu bay sinta su castigo “condicional” cu e tin riba su cabes. Mirando cu ela bolbe comete e mesun tipo di delito cu dos aña pasa, ela keda sentencia pe.