Tur cos ta indica cu na vispera di e manifestacion supuestamente nacional varios di e politiconan di AVP den e dianan aki ya ta mirando pitufo tur caminda y siguramente un di nan ta e parlamentario Robert Candelaria. Si, e mesun Candelaria aki cu tabata biba na Corsou y kende bao di capa di dienstreis, esta riba custia di pueblo a bin varios bes Aruba na 2017 pa bin negocia su number riba lista di AVP y de paso pone presion riba su lider Mike Eman pa wordo nombra como Director di Directie Scheepvaart, sin cu e sa un pataca di navegacion.
Falta di hombresa
Awe Robert Candelaria a bolbe bin cu e storia fabrica cu e gobierno actual ta den proceso pa legalisa marihuana recreacional. Un mentira flagrante ya cu den programa di MEP y di gobernacion ta para cu lo bay legalisa solamente marihuana medicinal y p’asina por yuda y alivia esnan cu ta sufri di epilepsia, cancer etc. den nan dolor. Aparentemente ta un cos bieu Candelaria lo a huma y a cuminsa mira pitufo tur rond di dje pa declara un disparate asina. Pero e problema cu AVP tin ta cu nan no tin e curashi pa declara publicamente cu nan ta contra legalisacion di marihuana medicinal y ta p’esey nan ta tira e parti recreacional riba e gobernacion actual y ta inventa tur locura pa hustifica nan falta di hombresa.
Paramento di subsidio
Tambe Robert Candelaria ta acusa e gobierno actual di a para subsidio na fundacionnan anti-droga, siendo cu esaki tampoco ta berdad. E minister actual di Salubridad algun luna pasa a reuni cu tur e trahadornan di Centro Colorado y tambe cu nan sindicato y a logra entre otro pa inverti den estudio di e trahadornan na e centro aki, nan beneficionan salarial y lo aloca fondo pa renobacion di e edificio, cualnan nunca a tuma lugar durante e gobernacion cu Candelaria a sosten ciegamente.
Masacre na FMAA
Lo ta bon pa Candelaria informa su mes prome cu e skirbi tanto disparate asina ya cu tabata hustamente bao di gobierno di AVP a corta drasticamente den subsidio na FMAA (Fundacion Maneho di Adiccion Aruba), a kita 25 trahador di FMAA for di trabao na 2014 y debi na e medida aki mester a stop cu tratamento y mester a manda e adictonan bek riba caya. Tambe den forma criminal AVP a cera e shelter den Oranjestad, caminda e adictonan tabata haya un dak riba nan cabes, cuminda, paña limpi, cuido medico etc. Tambe eyden nan tabata wordo motiva pa drenta rehabilitacion y p’asina nan por drenta comunidad bek. Pues si tin un gobierno cu a para subsidio na e fundacionnan aki, esey ta Gabinete Eman. Lo ta bon pa Candelaria puntra su colega ex minister Dowers tambe con a para cu e shelter nobo cu el a priminti cu tanto fanfaria lo bin den Playa Pabao.
Pero no tabata den e subsidio di FMAA e burdugonan di AVP so a corta, pero di SABA (nos grandinan), SVGA (nos hendenan special), FDEC (les di musica y arte), Balansa Nobo etc. Tur esaki, pasobra e politiconan di AVP tabata mester di placa pa nan por a complace nan activista y compinchinan politico. Esaki ta e berdad cruel cu Robert Candelaria mester biba cu ne.
Por ultimo, lo ta bon pa Candelaria cuminsa paga bek tur e gastonanan di e supuesto dienstreisnan y estadia cu el a bin Aruba riba custia di pueblo y p’asina negocia su number riba lista di AVP. Como ex-polis e mester tin berguensa di a coopera cu e deroche di placa di pueblo aki. Placa cu por a bay entre otro pa e fundacionnan anti droga.