Durante conferencia di prensa di Gobierno di Aruba dialuna mainta, Prome Minister Evelyn Wever-Croes a elabora riba e tema di Citgo y e General License #7a. Esaki a wordo otorga dos siman pasa despues di intervencion cu Gobierno di Aruba a haci cu autoridadnan mericano, pa asina fase dos di refineria por cuminsa.
Prome Minister a enfatisa cu a obtene e General License #7a a base di e peticion cu Gobierno a manda cu ta basa riba e informacionnan ricibi di Citgo mes. E notanan cu Gobierno di Aruba a manda pa Office of Foreign Assets Control (OFAC) ta basa riba e informacion di Citgo con nan structura ta hinca den otro y con e placa por yega. A base di esaki OFAC a tuma e decision pa duna Aruba un aliento temporal y parcial riba e sancionnan. Esaki naturalmente tin condicionnan mara na dje cua condicionnan Citgo no kier cumpli cu nan. Esaki, sinembargo, Prome Minister ta indica cu ta e parti huridico cu ta den man di abogadonan.
E situacion di refineria ta hopi dificil y Prome Minister ta lamenta cu e licensia #7a a sali despues cu ya nan a retira e gran mayoria di trahadonan. Gobierno ta para banda di e trahadonan y su meta ta pa trahadonan haya nan trabou bek. Esaki ta e lucha y compromiso.
Durante conferencia di prensa, Prome Minister a invita sindicato di refineria pa para tambe na banda di trahadonan y no vocifera e posicion di Citgo. No sali na defensa di Citgo bisando cu Citgo tin rason. Y tambe Prome Minister ta conseha tanto e sindicato y trahadonan, pa laga analisa e General License #7a y te hasta forma parti di e discusionnan cu ta andando, te hasta cu OFAC cu ta habri y transparente pa tur discusion dirigi riba refineria di Aruba.
Sindicato y trahado por comproba pa nan mes tambe cu e General License #7a ta dirigi y skirbi pa e refineria di Aruba. Pero sigur, esaki no ta e momento pa ripiti loke Citgo ta pensa. Esaki ta e momento pa e sindicato corda riba e trahado. Reaccionando riba e atakenan personal den direccion di Prome Minister, insinuando cu e ta gaña, e mandatario ta duna di conoce cu e no ta duna importancia na e atakenan aki. Loke si ta importante ta e trahadonan.
“Mi pregunta na Boy Anthony, Presidente di sindicato IOWA: “Na banda di KEN bo ta para?”. Ami ta lucha pa e trahadonan haya nan trabou bek. Señor Anthony por bin para na mi banda. Pero si e ta scoge pa para na banda di Citgo cu no kier e trahadonan bek y ta yama ami gañado, esey ta keda pa su consenshi. Ami lo sigui lucha pa trahadonan haya nan trabou bek. Ta importante pa e General License #7a wordo ehecuta pa trahadonan bin bek na trabou. Ta importante pa nos sigui convence Citgo cu e General License aki ta skirbi pa Aruba. Y si nan no cumpli cu n’e, lo tin mas sancion ta bin riba nan!”, Prome Minister Evelyn Wever-Croes a duna di conoce.