Parlamentario Endy Croes bastante indigna riba e maneho di Lotto pa deporte. Pio awor cu a logra ricibi porfin despues di hopi aña Financial Statements di añanan 2010 y 2011 di Lotto pa deporte. Locual a hala nos atencion mesora ta General Expenses, pues gastonan general. Manera nos tur sa cu desde medio di november 2009 un Bestuur nobo a wordo nombra den Lotto pa deporte door di Mike Eman y Mike De Meza. Un meta primordial tabata pa persigui tur esnan cu por tin un otro color como escogencia politico. Asina a manda Bestuur y Directornan cas y a cuminsa un investigacion riguroso.
Chica placa di deportistanan
Parlamentario Croes a sigui splica cu semper e sa cu activistanan di AVP den Bestuur di Lotto lo a malgasta masha hopi placa di nos deportistanan na investigacion pero nunca e tabata tin e pruebanan contundente y pa esnan cu conoce su persona e gusta papia cu prueba den man. Sinembargo aña 2019 a habri bon comokiera cu masha hopi documento mes a cuminsa bira conoci. Asina Parlamentario Endy Croes a divulga cu awor porfin e tin e Financial Statements oficial di FLPD pa locual ta trata aña 2010 y 2011. Locual ta remarcabel ta con e benta a cay. Na 2009 a laga atras un benta bruto di 42 MIYON pa aña mientras na 2010 esaki a cay te na 34 MIYON y na 2011 aun pio esaki a baha na 33 MIYON, pues a bay atras cu casi 10 MIYON den benta bruto. No obstante esaki Parlamentario Endy Croes a splica cu e Gastonan General a aumenta di 800 mil di aña 2009 pa 2.8 MIYON den aña 2010. Esaki ta veredico y ta den e rapport. Pues directiva “berde” amigo di Mike Eman y Mike de Meza a aumenta e gastonan general cu 2 MIYON florin den un aña. Ora a sigui busca den dicho Financial Statements a encontra cu na amigonan abogado so a paga Afl. 655.772 mil florin den aña 2010 mientras den aña 2011 a bolbe paga Afl. 370.000 na abogado pa un total di riba di 1 MIYON florin. Dieptriest!!! Na Ernst & Young y Security Management and investigations a paga den 2010 y 2011 un total di Afl.1.200.000 MIYON florin. Alaves a kibra contractonan vigente y a paga otro Afl. 269.426 florin na third parties.
Tur cu tur den 2 aña di AVP esta 2010 y 2011 a MALGASTA na investigacion 2.5 MIYON florin di placa di deporte.
E sinberguensanan aki tin curason?
Parlamentario Endy Croes ta puntra e hendenan aki por tabata tin nan curason na e lugar corecto? Pueblo sa cuanto canchanan deportivo por a wordo drecha cu e placa aki? Pueblo sa cuanto atleta por a ricibi un ayudo directo cu e placa aki? Na un manera sin gevoel ta nenga Federacion y atletanan placa pa deporte y ta horta na un manera “legal” placa di nos deportistanan pa yena saco di abogado y companianan di investigacion amigo? Abogadonan kendenan a strica hopi placa ta entre otro Benvinda Da Sousa (casa di Desiree Croes, candidata riba lista di AVP), Luci Herde, casa di Baba Herde trahando na abogado Kloes pa nombra algun. Un tal Aron Antersijn kende tabata hunga pa e “inspector Gadget” di Lotto y ta un amigo personal di Mike De Meza y Boracho v/d Berg tambe a strica masha hopi placa mes. Asina tin hopi mas. Nos lo cumpli pa pueblo haya sa con AVP a crea un smokescreen tras di un investigacion pa ranca masha hopi placa di nos deportistanan pa nan amigonan cu a sponser campaña di AVP na 2009. Nunca pero nunca mas bo por tira un voto pa AVP.