ORANJESTAD – Recientemente un grupo di 10 Aduanero a ricibi nan promocion como Verificateur di Aduana. Den un ceremonia den presencia di Minister di Finansa, Director y Chefnan, e 10 Verificadornan a haya nan Decreto Gubernamental y e respectivo “rangonderscheidingsteken“, epaulet y insinia a wordo poni na nan bachi den e ceremonia di bistimento di bachi di Verificateur.
Minister ta gradici cada Aduanero pa e esfuerso y e inversion cu cada un a haci den nan mes y den e Cuerpo di Aduana na beneficio di nos Pais. E estudio pa Verificateur tin un duracion di 2 aña y mey di estudio universitario y ta conta cu un periodo di 6 luna di pasantia na Douane Hulanda.
Mester menciona cu esaki ta e prome grupo cu a haci e estudio pa Verificateur na Aruba mes na nos Universidad di Aruba. Awor Cuerpo di Aduana y nos Pais por conta cu mas experticio.
E Aduaneronan cu a caba nan estudio cu exito y a ricibi na promocion corespondiente ta, sr. Edgar Croes, sra. Anna Gonzalez, sra. Sharina Hernandez, sra. Maribel Nuboer, sra. Mildred Peña, sra. Deyanira Ras, sra. Eliane Riley, sra. Ivette Semerel, sr. Enrico Soto y sra. Marilyn Webb. Pabien na boso tur y hopi exito cu e responsabilidad nobo aki den Cuerpo di Aduana na beneficio di nos Pais.