ORANJESTAD – Minister di Deporte sr. Dangui Oduber ta anuncia cu diasabra veld di Kudawecha oficialmente a haya su lusnan nobo. Esaki a wordo realisa hunto cu e ayudo di sr. Eddie de Veer di Meta Corp NV. Veld di Kudawecha ta conoci na Aruba como e veld di practica e deporte di softball.
Deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida. Pa e motibonan aki, Minister Dangui Oduber ta haya importante pa deporte na Aruba haya e atencion debido.
Minister Dangui Oduber ta sigui cumpli apesar cu e fondonan pa deporte ta hopi limita, asina mes a haci hopi pa deporte. E mandatario a menciona cu a yuda diferente clubnan cu material, airco y awor iluminacion. Intencion ta pa poco poco drecha den tur bario caminda tin necesidad pa cu deporte.
Ta di menciona cu e luznan nobo di LED lo reduci e gastonan di electricidad cu no menos cu 80%. Antes cada palo di luz tabata uza 35 AMP, awor esaki ta bai uza solamente 10 AMP. Un diferencia di 20 AMP.
Minister Oduber kier a gradici e dirigentenan di e veld di Kudawecha pa tur locual nan a haci pa e deporte di softball y ta deseanan tur clase di exito pa futuro. Esaki ta un otro ehempel bibo di con gobierno y sectornan priva ta traha hunto na bienestar di deporte y e comunidad di Aruba.