ORANJESTAD – Durante di e conferencia di prensa semanal di Gobierno, Minister di Finansa, Asuntonan Economico y Cultura a splica tocante di e cifranan di Cuentanan Nacional y e debe di pais Aruba.
No ta asina manera ta ser splica cu paso awor tin otro cifra di Cuentanan Nacional, cu tin espacio pa kita ‘crisisheffing’, Minister di Finansa, Asuntonan Economico y Cultura a subraya.
Ta bon pa recorda cu ta e Gobierno actual aki a pone fondonan disponibel den Oficina di Estadistica di Aruba pa asina e expertonan aki por a presenta Cuentanan Nacional for di aña 2013 te aña 2017. Algo cu e Gobierno anterior no a mira e necesidad y consequentemente nos pais tabata traha cu cifranan di Banco Central di Aruba. E Gobierno actual aki si a mira necesidad y importancia di tin cifranan real pa nos economia. Awor cu nos tin e cifranan real, otronan kier usa e cifranan aki pa malinforma nos pueblo.
E mandatario a sigui bisa cu e asunto aki ta un asunto serio, e ta tocante di situacion financiero di nos Pais. Pesey nos Gobierno ta traha diligentemente, cu un plan realistico pa por recupera poco poco pero sigur, e situacion financiero di nos pais. Pesey e Gabinete Wever-Croes a bin cu un maneho prudente pa por scapa e Pais aki.
Nos no mester lubida un informacion masha importante den tur locual ta ser usa pa brua nos pueblo. E MEGA debe cu e gobierno anterior a hinca nos pais aden, NO a disparce.
Pa splica en corto tocante di e GDP, esaki a crece cu un averahe di 3.1% GDP durante añanan 2013 pa 2017. E crecemento aki tin di haber cu nos turismo cu a subi y un importacion cu a baha. Durante e periodo ey nos tin cu bisa cu gobierno anterior su inversionnan a baha di 64 miyon na 2013 pa solamente 47 miyon den 2017. Esey ta nifica cu Gobierno anterior no a inverti suficiente e tempo ey.
Durante e temporada di AVP, e MEGA debe a crece cu un porcentahe di 8.3% mientras cu e economia cu a crece solamente cu 3.1% en e periode 2013-2017. Kico esaki ta nifica? Esaki ta mustra cu e debe a subi mucho mas halto pa locual e economia a crece. Como resultado cu NO ta e debe a crece e economia, alcontrario el a crea un caminda pa endeuda nos pais.
E debe a crece di 2,226 miyon na aña 2009 pa un debe di 4,159 miyon na aña 2017 cu 1,933 miyon florin. Pais Aruba tin cu paga e aña aki 230 miyon na interes, compara cu e 116.4 miyon cu tabata paga na aña 2009, esey kier men cu e gobierno anterior a redobla e gastonan di interes di nos pais.
Minister Xiomara a sigui splica cu durante di gobierno di MEP (2001 – 2009) e debe a crece cu 721 miyon y durante di e gobierno di AVP (2009 – 2017) e debe a crece a bira 1,933 miyon.
Ta bon pa menciona cu durante di periodo di gobierno di MEP durante añanan 2001- 2009, gobierno a logra paga dos bes e debe di Pais Aruba. Locual nos no por bisa di e Gobierno anterior, e mandatario a conclui bisando.