ORANJESTAD – United Nations General Assembly na 2012 a proclama 21 di maart como “International Day of Forests” (IDF). Na Aruba nos conoce mondi, e terminologia na Ingles ta Scrubland y na Spaño Matorral y na Hulandes ta Struikgewas. Na Aruba nos NO conoce areanan forestal, pero si un mondi cera di Mangel (Mangrove forest/ Mangrovewoud/Manglares), manera na Spaans Lagoen, Mangel Halto y Isla di Oro.
DNM ta haci inventarisacion den mondinan na Aruba. Ta inventarisa ki sorto di mata tin presente y ki bestianan ta uza esaki como nan lugar di biba. Ta celebra e dia aki door di conscientisa pueblo di Aruba riba e importancia di e mondinan cu tin na Aruba. Ariba tur International Forest Day ta encurasha paisnan pa tuma initiativanan local, nacional y internacional pa organisa actividadnan cu ta envolvi conscientisacion di areanan cu tin mondi cera y tambe plantacion di matanan. Un initiativa por ehempel ta encera plantamento di matanan na cantidad of actividadnan pa muchanan unda nan por siña di matanan local of di areanan selvanan/mondinan di otro paisnan.
E tema y lema pa 2019 di International Day of Forests ta Forests and education; Learn to Love Forests (Mondi y educacion; Siña stima nos mondi).
Ta importante pa comparti e informacion aki pa yuda e futuro generacion compronde mas di nos recursonan natural. Pa nan ta consciente di e importancia di mondinan y e matanan pa nan futuro. Ban siña nos muchanan di chikito caba pa conecta cu naturalesa na un manera respetuoso. Ban siña nan di chikito caba biba hunto cu naturalesa y no solamente biba di naturalesa (tuma y duna bek na naturalesa).
Awendia mas cu mitar di e poblacion mundial ta biba den cuidadnan y mas y mas nos ta biba desconecta di naturalesa. P’esey ta importante pa conscientisa riba e beneficionan di mantencion y preservacion di e area di mondi y vegetacion. E areanan aki ta yuda tene e aire, suelo, awa y hende sano. E areanan aki tin un rol masha importante ora ta atende/confronta cu fenomenonan actual manera cambio di clima, hamber na mundo y realisacion di un comunidad sostenibel.
Pero pakico nos ta celebra “International Day of Forests”?
Aruba no conoce areanan di mondi grandi debi cu nos ta un isla cu espacio limita. Cu mas rason nos mester cuida y proteha nos mondinan y vegetacion.
Hopi biaha ta neglisha areanan manera mondi of ta desaroya e areanan aki sin mas. E actitud aki pa cu nos areanan di mondi y vegetacion ta haci’e mas dificil pa yega na e metanan mundial pa desaroyo sostenibel (SDG’s). E areanan di mondi ta forma parti di bo bida diario den hopi forma sin cu bo mes ta realisa. Manera e SDG #1 mes ta indica: Caba cu pobresa den tur su forma y na tur caminda na mundo. Ademas areanan di mondi y vegetacion ta duna nos oxigeno pa hala rosea, ta duna nos di come, ta brinda sombra, ta embeyece nos paisahe y ta mantene nos biodiversidad. Ta importante pa siña e conexion di e areanan aki cu nos bida diario. Pa medio di educacion nos por pasa e conocemento pa nos muchanan p’asina nan siña stima naturalesa y matanan. Siña nos muchanan mas di nos leynan cu ta proteha matanan (flora) local. Siña nan tambe pa duna un aporte door di planta mas mata. Tambe establece sistemanan di maneho sostenibel di e areanan unda tin mondi y di e forma ey conserva e biodiversidad riba tera.
Maneho sostenibel di areanan di mondi ta resulta den comunidadnan fuerte cu un economia cu ta prospera. DNM ta felicita un y tur riba e dia aki cu e mensahe positivo pa encurasha nos muchanan pa ta mas consciente y aprecia nos mondinan, pero tambe siña di otro paisnan cu si conoce mondi diferente y selvanan.