Home » PROME MINISTER A ASISTI NA E ENCUENTRO SPECIAL DI SEA BUNITA SEA BO MES

PROME MINISTER A ASISTI NA E ENCUENTRO SPECIAL DI SEA BUNITA SEA BO MES

by Admin
0 comment 70 views

 

 

Diahuebs 21 di maart, riba dia mundial di Sindrome di Down, Prome Minister Evelyn Wever-Croes a asisti na un evento hopi special dedica na y pa nos muchanan special. ‘Sea Bunita Sea bo Mes’ a tuma luga na Cas di Cultura.

 

Prome Minister a expresa cu el a wordo honra cu e invitacion ricibi pa e comparti un dia asina bunita hunto cu nos muchanan special riba un dia na unda cu mundialmente tur e sernan special aki ta wordo poni den luz. Prome Minister a gradici e Fundacion di ‘Sea Bunita Sea bo Mes’ pa organisa e encuentro aki y invita alumnonan di Colegio Arubano. Nos muchanan special a demostra kico nan por dunando un bunita show y tur esnan presente a keda hopi contento y a admira e habilidadnan di nos muchanan special, nan ‘Speciabilities’.

 

“Ta hopi importante pa ora nos papia di inclusion, nos inclui tur hende den un desaroyo. Gobierno ta purbando pa crea oportunidadnan na Aruba pa percura pa niun hende wordo laga atras. Den esaki, nos muchanan special ta hunga un rol hopi importante. Tin biaha hende ta bisa cu tin hende ta normal y otro no. Ami no ta wak e asina. Ami ta wak cu nos tur ta diferente di otro. Awe nos tin muchanan cu habilidadnan special”.

 

Aña pasa Gabinete Wever-Croes a pone un capitulo bunita den historia di nos pais y a institui un comision cu lo enfoka riba e derechonnan y calidad di bida pa nos hendenan special. Inclusion di nos hendenan special ta un prioridad mas pa Gobierno di Aruba. E comision ta consisti di representantenan di Ministerio di Asuntonan Social, Departamento di Labor, Departamento di Salubridad, Minister di Husticia, Minister di Infrastructura, Minister di Enseñansa y tambe di Minister di Asuntonan General.

 

E reprentante di Prome Minister den e comision ta señor Hans Geerman. Señor Geerman ta un persona hopi apasiona riba e tereno di hendenan special y cu amplio experencia riba e tereno aki. E conoce con muchanan special ta lanta y loke falta pa brinda nan un bon calidad di bida. Señor Geerman varios biaha a expresa su deseo pa cosnan wordo bon regla pa nos hendenan special.

 

Meta di Gobierno ta pa inclui nos muchanan special na scolnan adecua y ekipa pa cuida muchanan special. Tambe mester bin un bon plan pa despues di scol e muchanan aki tin un luga bon pa keda mientras nan mayornan ta traha.

 

Ora nan drenta e edad hoben, mester percura tambe pa despues cu nan caba scol, nan por wordo inclui den un scol di ofishi. Tambe mester studia e posibilidad pa nan drenta scolnan regular.

 

Den nan edad di adulto, mester inclui nan den e mercado laboral. Gobierno di Aruba, pa medio di e comision aki lo studia tur posibilidad, lo yuda den inclusion di nos hendenan special den e mercado laboral. Despues di e face laboral, ta bin tambe e parti di cuido di salud y vivienda.

 

Prome Minister a encurasha nos comunidad, pa wak rond di nos, nos famia, amistadnan, y scolnan, y inclui tur hende y percura pa niun hende keda atras. Pasobra ora nos

yuda otronan bay padilanti, ta henter e comunidad ta bay padilanti.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio