Home » Parlamentario Setty Christiaans-Yarzagaray: Despues di 17 aña CBS a calcula GDP di pais Aruba bek

Parlamentario Setty Christiaans-Yarzagaray: Despues di 17 aña CBS a calcula GDP di pais Aruba bek

by Admin
0 comment 58 views

CUENTANAN NACIONAL DI CBS LO TA OBTENIBEL

Parlamentario Setty Christiaans-Yarzagaray, den rueda di prensa di Fraccion di MEP diaranson mainta, a felicita Centraal Bureau Statistiek (CBS) cu despues di 17 aña a logra atrobe termina e proyecto di Cuentanan Nacional di pais Aruba. Pa e Parlamentario esaki ta algo cu ta dun’e satisfaccion y alegria mirando e hecho cu e mes pa 20 aña a traha na e departamento aki.

E proyecto aki ta uno sumamente grandi na unda cu despues di 17 aña atrobe pais Aruba ta calcula e GDP, tur industria y tur actividad economico di Aruba. CBS a logra cu perseverencia apesar cu den e ultimo añanan nan tawata tin limitacion financiero pa traha pero tambe limitacion di capacidad di hende. Pa cua motibo e proyecto aki a dura 5 aña mas of menos pa wordo completa pero awo e resultadonan ta cla y lo ta obtenibel pronto den un publicacion.

E proyecto ta cubri entre otro e calculacion di GDP. E ultimo biaha cu CBS a calcula GDP tawata na aña 2002. Despues di 17 aña, CBS den e proyecto aki a saca un reeks di GDP for di 2013 te cu 2017. Sinembargo, e proyecto di Cuentanan Nacional aki ta sumamente grandi pues ta analisa un cantidad grandi di datomam y ta cubri hopi mas cu e GDP.

E publicacion di Cuentanan Nacional no ta obtenibel ainda. CBS a saca solamente un tabel di informacion pa asina cuminsa informa pueblo di e informacionnan cu lo bay bira obtenibel mientras cu e publicacion na e momentonan aki ta den proceso. E datonan aki cu lo bira obtenibel ta bay ta di sumo importancia pa dirigi un pais. Maneho di un pais, segun e Parlamentario, y miho direccion por wordo stipula basa riba e informacionnan obtenibel den e Cuentanan Nacional cu pronto lo ta obtenibel.

Pa haci un comparacion di e importancia di Cuentanan Nacional, e Parlamentario a indica cu tempo cu e mes tawata trahando ainda na CBS riba e proyecto di Cuentanan Satelite di Turismo cu ta un extraccion di Cuentanan Nacional, el a bay laga un proyecto atras. Den pasado no a pone fondo suficiente disponibel pa yega na datonan necesario y esaki tambe ta un actor di retraso. Tambe tawatin solamente un grupo selecto di hende cu e conocemento di e materia aki y di otro banda tambe mester a ricibi asistencia technico internacional. E limitacion di hende cu conocemento ta haci tambe cu e trabou a keda atrasa pa motibo tambe cu nan experticio a wordo rekiri pa entre otro gobernantenan. Apesar cu e gobierno a uza e experticio aki durante hopi aña, nan no tawata por a aloca e placa pa asina e informacionnan bira obtenibel.
Parlamentario Christiaans-Yarzagaray a duna di conoce tambe cu e informacionnan aki ta sumamente importante awo cu IMF ta na Aruba pa haya un miho bista con e economia di pais Aruba ta hinca den otro.

“Mi ta elogia y felicita CBS y tur otro departamento of instancia cu a sumistra CBS cu informacionnan pa por a realisa e proyecto di Cuentanan Anual cu exito. Awe Aruba a sali benifica danki na cooperacion di tur instancia”, Parlamentario Setty Christiaans-Yarzagaray a termina bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio