Durante di e Rueda di Prensa semanal di Gobierno, Minister di Desaroyo Teritoiral, Infrastructura y Medio Ambiente, Otmar Oduber a duna update riba e cantidad di zienswijze cu Directie Infrastructuur en Planning (DIP) a ricibi riba e concepto di Ruimtelijk Ontwikkelingsplan (cROP) 2019.
Rond di 120 zienswijze a wordo entrega door di ciudadanonan y / of instancianan, esaki ta un cantidad record sumamente positivo cual ta refleha e resultado di e proceso transparente cu a tuma luga pa percura pa comunidad ta bon informa di e proceso cu ta encaminando, Minister Otmar Oduber a splica.
Siguientemente lo contesta cada ciudadano/ instancia cu a entrega zienswijze pa notificanan cu a ricibi nan documento y cu ta atendiendo cu esaki. Conforme ley DIP lo forma un comision pa analisa cada zienswijze. Tambe mester percura cu den e ROP cu ta bay wordo publica tin un paragraf caminda cu ta atende cu e esaki. Den e proceso ey lo mira esnan cu ainda por wordo inclui den e cambionan cu ta tuma luga mirando e diferente motibonan cu e zienswijze wordo entrega, pues ainda lo tin e posibilidad cu den e ROP final por inclui eseynan, Minister Oduber a agrega.
Pa termina Minister Oduber a duna di conoce cu e Raad voor de Ruimtelijkeontwikkeling (RRO) (segun ley ta prescribi) lo tin un periodo maximo di dos luna pa por conseha Gobierno riba e concepto di e ROP, prome cu bay over na e paso final di publicacion di e ROP nobo pa e proximo 10 añanan na luna di mei 2019.