ORANJESTAD – Na final di 2018, a establece un acuerdo di colaboracion entre diferente departamento di gobierno cu ta concerni cu e topico di Medio Ambiente. E team ta hiba e nomber di Milieu Samenwerkingsteam (MST). MST ta consisti di siguiente departamentonan: Korps Politie Aruba (KPA), Bureau City Inspector (BCI), Directie Volksgezondheid (DVG), Dienst Techniesche Inspectie (DTI), Serlimar y di DNM. E acuerdo entre e departamentonan ta pa conhuntamente trata e tantisimo casonan di keho cu ta drenta na tur e departamentonan menciona y relaciona cu asuntonan di Medio Ambiente.
E kehonan ta drenta via telefoon, medionan skirbi manera email, accionnan di firma etc. E departamentonan ta reuni riba e kehonan y ta: pone prioridad na esunan cu urgencia, ta asigna un di e departamentonan pa ta trekker, ta consulta/busca e leynan cu ta regarda e asunto, y ta acerca esun cu ta haci su mes responsabel pa e hecho treci dilanti den e keho pa yega na un posibel solucion. Hopi biaha ta trata di un vecindario cu ta sufri un molester. E kehonan cu ta drenta ta porehempel: cria di bestia den bebouwde kom, keho regardando awa di pos riba caminda publico/tereno di hende/pa muha mata, molester di zonido, molester di autonan bieu cu ta trece sushedad y cu ta forma criadero di insectonan/djaka cu por causa malesanan contagioso pa hende.
E kehonan di criamento di bestia den bebouwde kom ta KPA y DVG atende esaki mayoria biaha. E articulonan 20 y 30 di Algemene Politie Verordening (APV) ta bisa cu ta prohibi pa cria bestia den bebouwde kom. E ta forma, no solamente, molester pa vecindario, pero tambe por trece cune malesanan contagioso pa hende.
DVG y BCI ta atende cu kehonan regardando awa di pos di vivienda. E actonan aki ta contra di e APV, articulonan 16, 17, 23 y 27. Tin kehonan ta drenta contra companianan cu ta benta awa di pos/laundry esakinan ta wordo atendi door di DVG y DNM. DVG ta duna asistencia cu testnan unda ta necesario pa substancia/confirma e casonan.
KPA y DVG ta atende casonan di molester di zonido. E ley di Hinderlijke geluidsverordening ta trata cu e casonan aki. Den e caso aki ta acerca DTI tambe pa coopera cu midimento di zonido.
Pa asuntonan di autonan bieu riba terenonan of banda di caminda, KPA, BCI y si ta necesario Serlimar ta trata e kehonan aki. KPA ta tene su Bario Rechercheurs na altura di tur e accionnan cu nan lo tuma den bario. Semper ta purba di yega na un solucion y ta busca e cooperacion di tur envolvi. Sa sosode cu ta referi algun caso na Openbare Ministerie (O.M.) por medio di un procesverbaal. Esakinan ta casonan cu lo por culmina cu un sancion.
DNM lo sigui informa comunidad pa nan ta al tanto di e leynan cu ta regarda cuido di nos medio ambiente.